पेनाल्टिइ जापान पराजीत / पोर्चुगलयात बुकाः स्पेन क्वाटरफाइनलय्

पेनाल्टिलय् जापनयात बुकाः पाराग्वे क्वाटरफाइनलय् प्रवेश याःगु दु । पाराग्वेनाप पेनाल्टिलय् ५-३या पराजय लिपा जापान विश्वकपं पिहावंगु दु ।

जापानया निंतिं युइचि कोमानों क्येकूगु स्वंगूगु पेनाल्टि प्रहार बारय् न्यायेवं जापान दबावय् लाःगु खः । दबावय् लानाच्वंगु इलय् पाराग्वेया निंतिं ओस्कार कारडोजों या:गु अन्तिम प्रहार नं गोलय् हिला पाराग्वें कसा ५-३गोलं त्याकूगु खः ।

न्हापांगु हाफय् पाराग्वेया दबावय् लाःसां जापानयात गोल यायेगु बांलागु ह्वताःत दुगु खः । ९० मिनेट तक गोल मजुइवं थप याःगु ३० मिनेटया अन्तिम इलय् जापानं गोल यायेत यक्व कुतः याःगु खःसा गोल धाःसा जुइमफुत । जापानया होन्डां ९८औं मिनेटय् प्रहार बांलागु याःगु प्री-किक पाराग्वेया गोलकिपर भिलारं पंगु खः ।

मेगू कासाय् युरोपियन च्याम्पियन स्पेनं पोर्चुगलयात १-०गोलं बुकाः क्वाटरफाइनलय् प्रवेश याःगु दु । आः क्वाटरफाइनलय् स्पनें पाराग्वेया सामना याइ ।

पोर्चुगलया बल्लागु रक्षापंक्तियात ल्यूने लाःका डेभिड भिल्लां स्पेनया निंतिं याःगु छगू जक गोल कासाया निर्णायक गोल जुल । कासाया ६३औं मिनेटय् जूगु उगु गोल डेभिड भिल्लाया निंतिं थुगु विश्वकपय् याःगु प्यंगूगु गोल खः ।

पोर्चुगलया निंतिं धाःसा स्टार कासामि क्रिष्टियानो रोनाल्डों छुं चमाटकार क्यनेमफेवं पोर्चुगल छेँ लिहांवनेत बाध्य जूगु दु ।

More Stories Like this