टेकुइ प्रहरी-माओवादी ल्वापु

माओवादी ज्याकू तोडफोड / डोजरं छेँ थुनेगु कुतः

येँ (सन्ध्या टाइम्स)/येँया टेकुइ च्वंगु प्रेम बहादुर श्रेष्ठया लिलाम जुइधुंकूगु छेँयात कयाः थौं सुथय् जूगु ल्वापुइ प्रहरीं डोजर हयाः उगु छेँय् तयातःगु माओवादीया ज्याकू तोडफोड याना बिउगु दुसा उकिया नापनापं छेँ तकं पीगु कुतः याःगु दु। उगु इलय् जूगु ल्वापुइ लानाः निम्ह मनू घाःपाः जूगु दुसा निम्हेसित ज्वना यंकूगु दु ।

प्रहरी वयाः आकाझाकां छेँय् तयातःगु माओवादी ज्याकू तोडफोड यायेवं प्रहरीलिसे थःपिनि ल्वापु जूगु खँ माओवादीया भ्रातृ संगठन नेवाः राष्ट्रिय मुक्ति मोर्चां धाःगु दु।
न्हापांनिसें विवाद जुयाच्वंगु उगु छेँया थुवाः प्रेम बहादुर श्रेष्ठ धाःसा ताः ई न्ह्यनिसें बेपत्ता जुयाच्वंगु दु। वय्कःया काय्पिं अरुण श्रेष्ठ व बरुण श्रेष्ठं थः अबुयात अपहरण यानातःगु धकाः जिल्ला अदालतय् मुद्दा तयातःगु जूसां सुनुवाई धाःसा मजुयाच्वंगु खः। थ्व निम्ह दाजुकिजां अबुयाके अंश काये ल्यं दनिगु जुयाच्वन। तर छेँ धाःसा बैंकं लिलाम याना बीधुंकल। लिलामय् उगु छेँ शशि न्यौपानें न्याना काःगु खः। तर छेँ लिलाम जुयाः प्रेमबहादुर श्रेष्ठयात वयेमाःगु ध्यबा नं छेँ न्याना काःम्ह न्यौपानेया हे बैंक खाताय् जम्मा जू वनाच्वंगु कारणं यानाः थ्व सम्पूर्ण प्रकरण हे किर्ते खनेदु धकाः काय्पिं अरुण व बरुणं दावी यानाच्वंगु दु। थ्व समस्या ज्यंकेगु लागिं मदयेकं मगाःम्ह अबुम्ह प्रेमबहादुरयात नं उमिसं हे अपहरण याना यंकूगु धइगु अरुण-वरुणया दावी दु। छेँ लिलाम जुइधुंकूसां थःपिनि अंश मकासें त्वःते मखु धकाः निम्हं दाजुकिजापिं उगु हे छेँया पिने स्वलात्या न्ह्यवंनिसें धर्ना च्वनाच्वंगु खः। थ्वहे झ्वलय् अरुण-वरुणया हे इनाप कथं उगु छेँय् माओवादीया थीथी भ्रातृ संगठनया ज्याकू च्वनाच्वंगु खः। थौं प्रहरी वयाः माओवादीया थ्वहे ज्याकूत तोडफोड याःगु खः ।

माओवादीया नेवाः मोर्चां दलालतय्सं षडयन्त्र यानाः नेवाः परिवारयात उगु छेँनं विस्थापित यायेत स्वयाच्वंगुलिं उकिया विरोधय् थःपिं सशक्त कथं न्ह्याः वनेगु खँ धाःगु दु। उगु छेँय् माओवादी संगठनत नेवाः राष्ट्रिय मुक्ति मोर्चा, नेवाः ल्याय्म्ह पुचः, महिला संघ आदि नापं पार्टीया वडा ज्याकू व थीथी जनवर्गीय संगठनत तयातःगु दु ।