हिन्दू नेताया हत्याय् मुस्मांयात छाय् द्वपं?

वीरगंजय् हिन्दू युवा संघया नायः काशी तिवारीया हत्या जूगु खँयात कयाः स्थानीय हिन्दू कट्टरतावादीतय्सं तःधंगु बबाल यानाच्वंगु दुसा प्रशासनं थुकियात अझ तःधंगु ल्वापुया विषय दयेकेत तिबः बियाच्वंगु संकेत पिहां वःगु दु। हत्यायात जातीय रंग बीगु ल्याखं आः नकतिनि थुकी ल्हाः दुम्ह धकाः मुस्लिम मुक्ति मोर्चाया छम्ह नेतायात ज्वंगु दु। छम्ह हिन्दूया हत्याय् ल्हाः दु धकाः मेम्ह मुस्मां नेतायात ज्वनेगु थ्व ज्यां भारतय् थें हिन्दूस्लिम दंगा सिर्जना याना बीगु तःधंगु खतरा दु। नेपालय् हे नं छुं ई न्ह्यः तिनि नेपालगञ्ज, कपिलवस्तु आदि लागाय् हिन्दू-मुस्लिम ल्वापु जुयाः तःधंगु हिंसा ब्वलंगु खँयात ल्वःमंके जी मखु। वीरगंज नं भारतीय सीमालिसे स्वाःगु थाय् जूगुलिं अन चीधंगु जक मौका दयेवं हे अज्याःगु जातीय ल्वापु ब्वलनी मखु धाये फइगु अवस्था मदु ।

हत्या जूम्ह हिन्दू युवा संघया नेता केवल हिन्दू धर्मया हिमायती जक मखु। वय्कः देशय् वःगु संघीय प्रणालीया विरोधी खःसा गणतन्त्र खारेज यानाः राजतन्त्र हयेमाः धइगु पक्षयाम्ह नं खः। न्ह्याक्व हे बिचाः पाःम्ह जूसां सुयां हत्या हे यायेगु पाय्छि मखु। थुकिया भर्त्सना याये हे माः। तर छगू हत्याया घटनायात मेगु हे मोड बियाः अझ मेपिं सलंसः मनूतय् हत्या जुइ फइगु वातावरण सिर्जना यायेगु ज्यायात नं पाय्छि धकाः तारिफ याये फइ मखु। छुं हे दसि मदयेक तप्यंक मुस्मां जातियात हत्याया द्वपं बीगु अज्याःगु हे ज्या खः। देशय् जातीय ल्वापु जुइमा धइगु चाहना यानाच्वंपिं मेगु हे तत्वं नं थ्व हत्या याःगु जुइफु। थ्व इलय् नेपाली जनता व राज्य सतर्क जुइमाःगु पक्ष धइगु थुखेपाखे खः ।

More Stories Like this