नेदरल्यान्द व ब्राजिलयात सफलता

प्रि-क्वाटरफाइनलया थःथःगु कासा त्याकाः नेदरल्यान्द व ब्राजिल क्वाटरफाइनलय् प्रवेश याःगु दु । आः क्वाटरफाइनलय् थुपिं निगू राष्ट्र दथुइ प्रतिस्प्रधा जुइ ।

रोबिन व स्नाइदरया छगू-छगूया गोलया ग्वाहालिं सोमवाः जूगु प्रि-क्वाटरफाइनलय् नेदरल्यान्दं स्लोभाकियायात २-१ गोलं बुकूगु खः । १८औं मिनेटय् रोबिनया गोल मार्फत नेदरल्यान्दं अग्रता काःगु खः ।

सुन्ताल रंगया जर्सीं जाःगु मोसेस माभिडा रंगशालाय् रोबिनया गोल लिपा दर्शकतय्सं भुभुजेला पुयाः गोलयात तःजिक लसकुस याःगु खः । दर्शकतय् उगु उत्साह ८४औं मिनेटय् स्नाइदरया मेगू गोल लिपा थप जूगु खः ।

स्लोभिकयाया अग्रपंक्तिं याःगु यक्व बांलागु प्रहारया नेदरल्यान्दया गोलकिपर मार्टिन स्टेकेनबर्गं पंगु खः । तर इन्जुरीइलय् स्लोभाकियाया रोर्बट भिटेकं याःगु प्रहारयात धाःसा मार्टिनं पनेमफुसां नेदरल्यान्डं कासा २-१गोल अन्तरं त्याकल ।

अथेहे मंगलवाः चान्हय् जूगु कासाय् जुआन, फाबिनो व रोबिन्होया छगू-छगू गोलया ग्वाहालिं ब्राजिलं चीलियात बुकाः क्वाटरफाइलनय् प्रवेश याःगु दु ।

इलिस पार्क रंगशालाय् जूगु कासाया ३५औं मिनेटय् जुआनं कर्नरं वःगु बलयात हेडिङ मार्फत गोल याःगु खः । जुआनं गोल याःगु स्वंगू मिनेट लिपा ३८औं मिनेटय् हे फाबिनो ब्राजिलया निंतिं मेगू छगू गोल थप याःगु खः । काकाया पासय् फाबिनों ब्राजिलया निंतिं निगूगु गोल याःगु खः ।

लिपा ५९औं मिनेटय् रोबिन्हों ब्राजिलया निंतिं थप छगू गोल याःगु खः । ५५,००० दर्शकतय् न्ह्यने चीलियात बुकाः ब्राजिल सन् १९९० निसें निरन्तर विश्वकपया क्वाटरफाइलय् प्रवेश यायेत ताः लाःगु दु ।

More Stories Like this