'मधेशीतय्गु हानं मंकाः मोर्चा'
येँ (सन्ध्या टाइम्स)/आपूर्ति मन्त्री राजेन्द्र महतों संविधान व संघीयताया निंतिं मधेशवादी दलत हाकनं मोर्चाबन्दी कथं न्ह्याः वनेगु गृहकार्य यानाच्वनागु जानकारी बियादीगु दु। थौं सुथय् जनकपुरय् पत्रकारतलिसे खँ ल्हासें वय्कलं थ्व खँ धयादीगु खः ।
नेपाल सद्भावना पार्टीया नायः नं जुयादीम्ह मन्त्री महतों स्वंगू तःधंगु दलत सत्ता भागबण्डाय् वनाच्वंगुलिं संविधान निर्माण व शान्ति प्रक्रिया न्ह्याके मफुगु खः धयादिल ।
संविधान व संघीयता विना मधेश अधिकार दइ मखु धासें वय्कलं संघीयताया ग्यारेन्टीया निंतिं संविधान माः उकिया निंतिं मधेशवादीतय्गु मंकाः मोर्चा दयेकाः दवाव बीमाःगु बिचाः नं प्वंकादिल। स्वंगू दल दथुइ वंगु जेष्ठ १४ गते चान्हय् जूगु सम्झौता आः बेकार साबित जुल धासें मन्त्री महतों स्वंगू दल असफल जुइधुंकूगुलिं आः मधेशवादी दलतय्सं निर्णायक भूमिका म्हितेमाः धयादिल ।
स्वंगू तःधंगु दलया नेतात शासक वर्गनाप स्वापू दुपिं खः धासें सुशील कोइराला, झलनाथ खनाल व पुष्पकमल दाहालपिं आम नागरिकयात समावेशी व समानुपातिक अधिकार हस्तान्तरण जुइमाः धइगु भावना दुपिं नेता मखु धकाः नं द्वपं बियादिल ।
