असफल राष्ट्रपाखे ब्वाँय् वनाच्वंगु नेपाः
असफल राष्ट्रतय् धखलय् नेपाः धमाधम न्ह्यःने लाः वनीगु क्रमय् दु। फरेन पोलिसी नांगु पत्रिका व फन्ड फर पीस नांगु संस्थां सार्वजनिक याःगु असफल राष्ट्र जूवनेत्यंगु खतरापूर्ण धलखय् नेपाः २६ औं नम्बरय् लानाच्वंगु दु। यदि नेपाःया राजनीतिक पार्टीतय्सं राज्य सञ्चालनय् क्यनाच्वंगु भूमिका थथे हे जुयाच्वन धाःसा नेपाः याकनं हे विश्वया छगू न्हूगु असफल राष्ट्र जूवनीगु खँय् शंका मदु ।
खास यानाः देशय् राज्यया पूर्ण पकड मंत धाःसा, जनतायात बीमाःगु सुरक्षा, राहत आदि छुं हे चूलाके मफुत धाःसा, सुरक्षास्थिति तसकं नाजुक जूवन धाःसा मुलुक असफल राष्ट्र जूवनीगु खः। असफल राष्ट्र जुइगु लागिं दयेका तःगु थुपिं फुक्कं मापदण्डय् नेपाः लानाच्वंगु जक मखु थ्व सम्पूर्ण मापदण्डया मात्रा नेपाः दुने न्हियान्हिथं अप्वया समेत वनाच्वंगु दु। थ्व हे खतराया धलखय् लानाच्वंगु मेमेगु देशत सामान्य मेहनत यानाः नं थुकिं पिहां वये फइ जुइ तर नेपाः धाःसा अज्याःगु सामान्य मेहनतं पिहां वये मफयेफु। छाय्धाःसां नेपाः चांचां विकास जुइगु लागिं दयेमाःगु छुं नं कथंया सम्पदाय् धनी मखु। थन गबलें नं गतिशील अर्थतन्त्रं थाय् मकाः। अतिकं तन्नम थ्व देशं अवसर हे दुसां नं याउँक आर्थिक प्रगति याये फइगु आधार मदु। अय् जूगुलिं नेपाःया नेतातय्सं आः ई दुबलय् हे बिचाः मयायेगु खःसा थ्व देय् लिपा गबलें हे बचे याये मफइ कथंया दुर्घटनाय् लाइगु निश्चित दु। गुगुं नं देय् छक्वः असफल जुइधुंकाः उकियात हानं पुलांगु हे थासय् हयेगु अःपुगु ज्या मखु। उकिसनं नेपाः थेंज्याःगु देशया लागिं झन हे थाकुगु ज्या जुइ थ्व ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
