इंग्ल्यान्डया विश्वकप यात्रा क्वचाल / जर्मनी व अर्जेन्टिया क्वाटरफाइनलय्

विश्वकप फुटबल अन्तर्गत जर्मनीं इंग्ल्यान्डयात ४-१गोलं बुका क्वाटरफाइनलया यात्रा सुनिश्चित याःगु दु । जर्मनीया बांलागु प्रदर्शनं जक मखसें इंग्ल्यान्डयात भाग्यं नं साथ मबीवं इंग्लिस टिमं सन् २०१०या विश्वकप यात्रा प्रि-क्वाटरफाइनलय् हे क्वचाकेत बाध्य जूगु दु ।

इंग्ल्यान्डया मिडफिल्डर ल्याम्पार्डं याःगु प्रहार गोल लाइनं दुहावंगु खःसां रेफरीं गोल मबीवं कासाय् इंग्ल्यान्डयात भाग्यं नं साथ मब्यूगु खः । निगू गोलं ल्यूने लानाच्वंगु इंग्ल्यान्डया निंतिं ल्याम्पार्डं याःगु उगु गोल मान्य जूगु खःसा कासाया न्हापांगु हाफ तक २-२या बराबरी जुइगु खः ।

ल्याम्पार्डयात गोल मबीवं निगूगु हाफय् जर्मनीया निंतिं जोर्ज थोम्सनं निगू गोल थप यानाः जर्मनीं ४-१ गोल अन्तरं शान्दार रुपं कासा त्याकूगु खः । कासाया न्हापांगु हाफय् मिरोसलाभ क्लोस व लुकास पोडोलोस्किं जर्मनीया निंतिं छगू-छगू गोल याःगु खःसा इंग्ल्यान्डया निंतिं छगू जक गोल म्याथ्यु अपसनं ३७औं मिनेटय् याःगु खः ।

अथेहे सोमवाः चान्हय् जूगु अर्जेन्टिना व मेक्सिको दथुइया कासा अर्जेन्टिनां ३-१ गोलं त्याकूगु दु । अर्जेन्टिनाया थ्व विजय नापं आः क्वाटरफाइनलय् जर्मनीया सामना याइ । सन् २००६या क्वाटरफाइनलय् नं थुगु निगू टिमया भिडन्त जूगु ख: । उगु कासाय् अर्जेन्टिनायात बुका जर्मनी सेमि-फाइनलय् प्रवेश या:गु ख: ।

छगू विवादास्पद गोल नापं कार्लोस तोभेजया निगू गोल व गोन्जालो हुगुआनया छगू गोलया ग्वाहालिं अर्जेन्टिनां थ:गु कासा त्याका क्वाटरफाइनलय् प्रवेश याःगु दु । २६औं मिनेटय् लियोनल मेसिया पासय् ताभेजं हेडिङ मार्फत गोल यानाः अर्जेन्टिनायात अग्रता ब्यूगु खः । तर गोल याःगु इलय् ताभेज अफसाइड जूगुलिं गोल विवादय् लाःगु खःसां इटालीया रेफरी रोबर्टों उकीयात गोलया मान्यता ब्यूगु खः ।

लिपा ३३औं मिनेटय् हुगुआनं अर्जेन्टिया निंतिं निगूगु गोल यानाः कासायात २-०या स्थितिलय् थ्यंकूगु खः । ताभेजं निगूगु हाफया ५२औं मिनेटय् मेगू छगू गोल थप याःगु खःसा मेक्सिकोया निंतिं ७१औं मिनेटय् जेभिएर हरनान्डेजं छगू जक गोल याःगु खः ।

More Stories Like this