उरुग्वे व घाना क्वाटरफाइनलय्

प्रि-क्वाटर फाइनलया न्हापांगु न्हिया कासाय् दक्षिण कोरियायात बुकाः उरुग्वे व अमेरिकायात बुकाः घानां क्वाटरफाइनलय् थःगु थाय् सुरक्षित याःगु दु । आः क्वाटरफाइनलय् उरुग्वें घानाया सामना याइ ।

शनिवाः बहनी जूगु न्हापांगु प्रि-क्वाटरफाइनल कासाय् दक्षिण कोरिया विरुद्ध २-१ गोलं त्याकाः थुगुसीया विश्वकपय् दक्षिण अमेरिकी महादेशीय् राष्ट्रं थःपिनिगु प्रभुत्वयात निरन्तरता ब्यूगु दु । लुइस सुआरेजया निगू गोलया ग्वहालिं उरुग्वे पीदँ लिपा विश्वकपया क्वाटर फाइनलय् प्रवेश याःगु ख: ।

न्हापांगु चरणय् मेक्सिको विरुद्ध छगू जक गोल याम्ह सुओरेजं कोरिया विरुद्ध न्हापांगु हाफय् छगू गोल यानाः उरुग्वेयात अग्रता ब्यूगु खःसा निगूगु हाफया ६८औं मिनेटय् कोरियन कासामि ली छुङयोङं हेडिङ मार्फत गोल यानाः कासायात बराबरीलय् हःगु खः ।

कासाया ९०गू मिनेट क्वचाय् छुं मिनेट न्ह्यः पेनाल्टि एरिया स्वयां भचा पिने नं सुआरेजं याःगु प्रहार गोल जुइवं कोरियाया क्वाटर फाइनल वनेगु आशा समाप्त जूगु खः ।

अथेहे आइतवाः चान्हय् जूगु अमेरिका व घाना दथुइया कासाय् घानां २-१ गोलं कासा त्याकूगु दु । अमेरिकाया आः तकया हे दकलय् सशक्त कासामित दुथ्याःगु टिक कथं कयातःगु थुगु पुचःयात घानाः बुकाः क्वाटरफाइनलया यात्रा सुनिश्चित याःगु दु । थ्व नापं घाना थुगु विश्वकपया क्वाटरफाइनलय् दुहावंगु छगू जक अफ्रिकी देय् जूगु दु ।

कासा सुरु जूगु न्यागू मिनेटय् हे रिकार्डो क्लार्क्रया पासय् केभिन प्रिन्स बोआटेङं गोल यानाः घानां १-० गोलं न्ह्यने लाःगु खः । अमेरिकाया निंतिं ६२औं मिनेटय् पेनाल्टि मार्फत लान्डोन डोनोभानं गोल याःगु खः ।

लिपा कासाया इन्जुरी समया नं लिप्पांगु मिनेटय् घानाया कप्टान असामो ज्ञानया गोलं अमेरिका विरुद्धया कासा त्याकेत सफल जूगु खः । थुगु जीत नापं आः घानां क्वाटरफाइनलय् उरुग्वेया सामना याइ ।

More Stories Like this