नेपाल टेलिभिजनया प्रतिगामी पलाः

नेपाल टेलिभिजनं प्रशारण यानाच्वंगु थीथी भाय्या समावेशी ज्याझ्वः आवंलि न्ह्याके फइ मखु धकाः बन्द याना बिउगु दु। शुरुइ ला विश्वकपया कारणं स्थगित यायेमाःगु धाःगु खःसां आः वयाः ज्याझ्वः हे दिकागु जुल धकाः ज्याझ्वः सञ्चालकतय्त पौ बिउगु समाचार पिहां वःगु दु। देशय् फुक्कं जाति भाषायात समान अधिकार बीमाः धइगु सः थ्वयाच्वंगु व जातीय समानताया दिशापाखे हे देय् न्ह्यानाच्वंगु थौंया इलय् राष्ट्रिय टेलिभिजन च्यानलपाखें प्रशारण जुयाच्वंगु फुक्कं भाषाभाषीया ज्याझ्वः दिकेगु धाथें नं खेदपूर्ण ज्या खः। थुकियात सम्पूर्ण जातजाति, भाषाभाषी व जातीय समानताया पक्षधरतय्सं भर्त्सना यायेमाः ।

देय् संघीय प्रणालीइ प्रवेश जुइत्यंगु दु। देय्यात संघीय प्रणालीइ यंकेमाःगु हे सकलें जातजातियात समान अधिकार बीगु लागिं खः। उकिं अज्याःगु संघीय प्रणालीया अभ्यास यायेगु लागिं नं सञ्चार, शिक्षा, प्रशासन, न्यायालय आदि थीथी ख्यलय् थीथी भाषायात थाय् बिया यंकेमाःगु खः। तर नेपाल टेलिभिजनं उकिया अःखः दुगु समावेशी ज्याझ्वः नं लिकयाः पूर्ण रुपं प्रतिगामी पलाः ल्ह्वंगु दु। देशय् हानं नं ब्रम्हूवादी प्रतिगामी तत्वतय्सं छ्यं ल्ह्वना हयाच्वंगुया थ्व छगू ज्वलन्त दसि खः। यदि थ्व पलाःयात पनेगु ज्या मजुल धाःसा अज्याःपिं प्रतिगामीतय्सं मेमेगु थासय् नं उकथंया पलाः ल्ह्वना हइ। प्रशारित कार्यक्रमया स्तर, व्यक्ति मयःसा उकियात हिले जिउ। तर ज्याझ्वः हे लिकाःगु सुयातं स्वीकार्य जुइ मखु। सकलें जनजातित जानाः नेपाल टेलिभिजनया थ्व प्रतिगामी पलाःयात गतिलाःगु लिसः बी हे माः ।

More Stories Like this