छाय् पन कान्तिपुरया भ्वं?

भारतीय पत्रकारत आन्दोलनय् वइगु

येँ (सन्ध्या टाइम्स)/भारतं पनातःगु कान्तिपुर प्रकाशनया न्युजप्रिन्ट याकनं त्वःतकेत संसदया सार्वजनिक लेखा समितिं सरकारयात निर्देशन बिउगु दु ।

भारतया कोलकाता बन्दरगाहय् उगु न्युजप्रिन्ट पना तःगु खः। थुकियाबारे लेखा समितिं थौं सुथय् परराष्ट्र व वाणिज्य मन्त्रीयाके प्रस्टीकरण काःगु दु। समितिं निम्हं हे मन्त्रीयात न्युजप्रिन्ट याकनं त्वःतकेत नापं लिपा थज्याःगु समस्या हाकनं मवयेकेत निर्देशन बिउगु खः। परराष्ट्रमन्त्री सुजाता कोइराला मदुगुलिं वय्कःया भाला कयाच्वंम्ह उर्जा मन्त्री प्रकाशशरण महत व वाणिज्य मन्त्री राजेन्द्र महतो नापं निगुलिं मन्त्रालयया सचिवयात नं सःतूगु खः। उगु बैठकय् सभासद्तय्सं भूपरिवेष्ठित देय्या निंतिं समुद्र तक पारवहन पहुँच मौलिक अधिकार खः धासें भारतं हेपे यानाः पत्रिकाया भ्वं पनातःगु बिचाः प्वंकूगु खः ।

मन्त्रीतय्सं धाःसा थःपिंसं भ्वं पनातल धकाः सीवं हे उकियात त्वःतकेगु निंतिं कुतः यानाच्वनागु जानकारी बिउगु खः। वय्कःपिंसं थ्व मामिलाय् नेपाः-भारत स्वापुती हे लिच्वः लाइ कथं न्ह्यःनेलाःथे टिप्पणी मयायेत इनाप नं यानादिल ।

उखे कान्तिपुरया भ्वं दिकातःगु खँयात कयाः भारतया पत्रकारतय्सं नं आपत्ति प्वंकुसें सीमावर्ती पत्रकारतय्सं आन्दोलनया ख्याच्वः बिउगु दु। इन्डो-नेपाल पत्रकार एशोसिएसनं कान्तिपुरया न्युजप्रिन्ट पनातल धाःसा आन्दोलन यायगु ख्याच्वः बिउगु खः। भारतया नेशनल युनियन फर जर्नालिस्ट एशोसिएशनया बिहार च्याप्टरं नं न्युजप्रिन्ट तत्काल हे नेपालय् यंकेगु वातावरण दयेकेत भारत सरकारयात माग याःगु दु। भ्वं दिकातःगु धइगु प्रेस स्वतन्त्रतायात हे आक्रमण याःगु खः धकाः नं उमिसं प्रतिक्रिया बिउगु दु ।

भारत थेंजाःगु लोकतान्त्रिक देशं नकतिनि जक लोकतन्त्रय् पलाः तःगु देय्या प्रतिष्ठित मिडियाया भ्वं दिकातःगु धइगु तसकं म्हाइपुसेच्वंगु खँ खः धकाः नं उमिसं धाःगु दु ।

थ्वहे दथुइ नेपाः-भारत सीमा लागाय् सक्रिय जुयाच्वंगु पत्रकारतय्गु मंकाः संगठन इन्डो-नेपाल पत्रकार एसोसिएशनं कान्तिपुरया न्युजप्रिन्ट याकनं मत्वःतल धाःसा आन्दोलन यायेगु जुइ धकाः ख्याच्वः बिउगु दु।
एशोसिएसनया भारतीय संयोजक पंकज रन्जितं भारत सरकारया अधिकारीतलिसे थःपिंसं थुकिया बारे वार्ता यायेगु नापं मत्वःतल धाःसा आन्दोलन यायेगु जुइ धयादीगु दु ।