जापान मेगू चरणय् / नेदरल्यन्डं स्लोभाकियाया सामना याइगु

एसियन पावर हाउस जापान न्हापांगु पटकय् थःगु छेँ नं पिने म्हितुगु विश्वकपया निगूगु चरणय् दुहावंगु दु । शुक्रवाः चान्हय् डेनमार्क यात ३-१ गोलं पराजीत यानाः प्रि-क्वाटर फाइनलय् प्रवेश याःगु दु ।

न्हापांगु हाफय् केइसुके होण्डा व युसुहितो इन्डोयां याःगु छगू-छगू गोलया कारणं डेनमार्क विरुद्धया कासा ३-१ गोलं त्याकेत अपूगु खः । डोण्डा व इन्डो निम्हेसिनं फ्री किक मार्फत सान्दार गोल याःगु खः । कासाया ८१औं मिनेटय् डेनमार्कया निंतिं दाल थोमसनं गोल याना: २-१या स्थितिलय् थ्यंकूगु खःसां ८७औं मिनेटय् सिन्जि ओकाजाकीं जापानया निंतिं थप छगू गोल याःगु खः ।

डेनमार्क नापया कासा त्याकाः जापान ६ अंक सहित ग्रुप 'इ'या निगूगु थासय् लाःगु दुसा डेनमार्क ३अंक सहित स्वंगूगु थासय् लाना विश्वकपं पिहावंगु दु । सन् २००२लय् जापान व दक्षिण कोरियां मंका रुपं ग्वसाःग्वःगु विश्वकप धुंका जापान न्हापांगु पटक निगूगु चरणय् प्रवेश याःगु दु ।

अथेहे ग्रुप 'इ' अन्तर्गतया मेगू कासाय् नेदरल्यान्डं क्यामरुनयात बुकाः मेगू चरणय् प्रवेश याःगु दु । क्यामरुन धाःसा ग्रुपया लिप्पांगु थासय् लानाः विश्वकपं पिहावंगु दु । शुक्रवाः चान्हय्या कासाय् क्यामरुन नेदरल्यान्ड नाप २-१ गोलं पराजीत जूगु खः ।

केप टाउनया ग्रीन पोइन्ट रंगशालाय् जूगु कासाय् पूर्ण अत्मविश्वास व बांलागु कासा मार्फत नेदरल्यान्डं क्यामरुनयात बुकूगु खः । नेदरल्यान्डया निंतिं भान पर्सिं ३६औं मिनेटय् गोल यानाः कासाय् अग्रता का:गु खःसा ८३औं मिनेटय् रोबिनं नेदरल्याण्डया निंतिं थप छगू गोल याःगु खः । क्यामरुनया निंतिं स्यामियुल इटों पेनाल्टि मार्फत छगू जक गोल याःगु खः ।

९अंक सहित ग्रुप 'इ'या न्हापांगु स्थानय् लाःगु नेदरल्यान्डं आः स्लोभाकियाया सामना याइगु जूगु दु । जापनं धाःसा पाराग्वे नाप प्रतिस्प्रधा याइ ।

More Stories Like this