डिफेन्डिङ च्याम्पियन इटाली विश्वकपं पिने / पाराग्वे व स्लोभाकिया मेगू चरणय्

स्लोभिकाया नाप ३-२ गोलं पराजीत जुयाः डिफेन्डिङ च्याम्पियन इटाली विश्वकपं पिहावंगु दु । न्हापांगु निगू कासा बराबरीलय् क्वचाःगु इटालीया न्हापांगु चरणया अन्तिम कासाय् स्लोभाकियायात त्याके मफेवं इटाली छेँय् लिहांवनीगु जूगु दु ।

रोवर्ट भिटिकं २५औं मिनेटय् हे डानियल रोसीया पासय् इटाली विरुद्ध गोल यानाः स्लोभाकियायात अग्रता ब्यूगु खः । ७३औं मिनेटय् कर्नर मार्फत वःगु बलयात हानं गोल यानाः भिटिकं स्लोभाकियायात निगू गोलया अग्रता ब्यूगु खः ।

इटालीया निंतिं आन्तोनियो नाटालं ८१औं मिनेटय् गोल यानाः गोल अन्तरयात सतिकू खःसां उगु गोलया च्यागू मिनेट लिपा हे स्लोभानियाया निंतिं कामिल कोपुनेकं स्वंगूगु गोल याना: कासायात ३-१या स्थितिइ थ्यंकूगु खः । इटालिया निंतिं इन्जुरी समयलय् फाबियों छगू गोल थप याःगु खः ।

ग्रुप 'एफ' अन्तर्गत इटाली २ अंक सहित लिप्पांगु थासय् लाःगु दुसाः स्लोभाकिया ४ अंक सहित निगूगु थासय् लाःगु दु । ग्रुपय् ५ अंक सहित पाराग्वे न्हापांगु थासय् लायेत ताः लाःगु दुसाः न्युजिल्यान्ड ३ अंक सहित स्वंगू थासय् लाःगु दु ।

बिहीवाः हे ग्रुप 'एफ' अन्तर्गत जूगु पाराग्वे व न्युजिल्यान्ड दथुइया कासा बराबरीलय् क्वचाःगु दु । पाराग्वे नापया कासा बराबरी यानाः न्युजिल्यान्ड विश्वकपं पिहावंगु दुसाः पाराग्वे मेगू चरणय् दुहावंगु दु ।

तुलनात्मक रुपं निगूलिं टिमं कमजोर रुपं म्हितुगु कासाया ७६औं मिनेटय् पाराग्वेया निंतिं गोल यायेगु छगू बांलागु ह्वताः चूलागु खः । पाराग्वेया निंतिं इडगार बेन्टेजं क्येकूगु प्रहार न्युजिल्यान्डया गोलकिपरं बचे याःगु खः ।

More Stories Like this