अमेरिका, इंग्ल्याण्ड, जर्मनी व घाना मेगू चरणय्

अन्तिम कासाय् थःगु प्रतिद्वन्दियात बुकाः ग्रुप 'सी' पाखें अमेरिका व इंग्ल्याण्ड निगूगु चरणय् दुहावंगु दु । मेखे ग्रुप 'डी' पाखें जर्मनी व घाना मेगू चरणय् प्रवेश याःगु दु । आः मेगू चरणय् इंग्ल्याण्ड व जर्मनी दथुइ भिडन्त जुइसाः अमेरिकां घानाया सामना याइगु जूगु दु ।

विश्वकप धेंधेबल्लाय् न्हापांगु पटक आक्रामक रुपं म्हितुसें इंग्ल्याण्डं स्लोभानियायात १-० गोलं बुकूगु खः । जेम्स मिलनरया क्रसय् स्ट्राइकर जेरमेन डेफों २३औं मिनेटय् गोल यानाः पोर्थ एलिजाबेथय् दुपिं इंग्लिस समर्थकतय् राहत ब्यूगु खः ।

थुगुसि विश्वकपय् म्हितुगु न्हापांगु निगू कासा बराबरीइ क्वचायेवं आलोचित जुयादीम्ह इंग्लिस कोच क्यापेलों थुगु कासा त्यागुलिं कासामितय्त भचा राहत जूगु व दबाव पाखें मुक्त जूगु प्रतिक्रिया बियादिल ।

अथेहे ग्रुप 'सी' अन्तर्गतया अमेरिका व अल्जेरिया दथुइया कासाय् इन्जुरी मिनेटय् ल्याण्डन डोनोभानं या:गु छगू जक गोलं कासा त्याकूगु खः । प्यंगू मिनेट थप याःगु इन्जुरी समयलय् काउन्टर अट्याक मार्फत गोल यानाः अमेरिका मेगू चरणय् दुहावंगु ख: ।

न्हापांगु चरणय् निगू कासा बराबरी व छगू कासा त्याकाः मेगू चरणय् प्रवेश याःगु अमेरिकी टिमयात बधाई बीत अल्जेरिया कासा लिपा पुलांम्ह अमेरिकी राष्ट्रपति बिल क्लिन्ट कासामितय् लकर रुमय् थ्यंकादीगु खः । च्यादँ लिपा न्हापांगु विश्वकप कासा त्याकूगु अमेरिकी टिमयात वय्कलं अन ४५ मिनेट च्वनाः बधाई बियादिल ।

अथेहे ग्रुप 'डी' अन्तर्गत जर्मनीं घानायात बुकाः मेगू चरणय् दुहावंगु दुसाः घाना पराजीत जुयाः नं मेगू चरणय् दुहावंगु दु । मेगू कासाय् अष्ट्रेलियां सर्बियायात २-१ गोलं बुकाः नं विश्वकपं पिहावंगु दु ।

मेसुत ओजिलं डी एरिया स्वयां पिने नं याःगु सशक्त प्रहार गोलय् हिउगु खः । मेसुतया छगू जक गोलया ग्वाहालिं जर्मनीं घानायात बुकूगु खः । न्हापांगु कासाय् अष्ट्रेलिया विरुद्ध सान्दार विजय हासिल याःसां निगूगु कासाय् सर्बिया नाप बुइवं जर्मनीयात थुगु कासा त्याके हे माःगु दबाव दुगु खः ।

घाना छगू कासा बराबरी, छगू कासाय् जीत व मेगूलि पराजीत जुसां ग्रुप 'डी'लय् ४ अंक सहित निगूगु थासय् लाःगु दु । थ्व नापं घाना अफ्रिकी महादेशं निगूगु चरणय् प्रवेश याःगु छगू जक देय् जुइत ताः लाःगु दु ।

ग्रुप 'डी'या मेगू कासाय् अष्ट्रेलियां सर्बिया विरुद्ध २-१या जीत दर्ता याःसां अंक तालिकाय् स्वंगू थासय् लाना विश्वकपं पिहावंगु दु । अष्ट्रेलिया नापं सर्बिया नं पिहावंगु दु । सर्बिया अंक तालिकाय् ३ अंक सहित दकलय् ल्यूने लाःगु खः ।

More Stories Like this