संविधान च्वज्या न्ह्याकेगु सहमति
स्वला लिपा बल्ल संविधानया खँ जुल
येँ (सन्ध्या टाइम्स)/न्हूगु संविधान दयेकेगु विषयय् स्वला लिपा वयाः बल्ल संविधानसभाया मूमू राजनीतिक पार्टीया शीर्ष नेतातय् दथुइ सहलह जूगु दु। शीर्ष नेतातय् थ्व सहलहं संविधान निर्माणया ज्यायात निरन्तरता बिया वनेगु सहमति दयेकूगु खः ।
संविधानसभाया अध्यक्ष सुवास नेम्वाङया कुतलय् थौं सुथय् संविधानसभाय् निघौ तक स्वंगू दलया शीर्ष नेतातय्गु बैठक च्वंगु खः। उगु बैठकय् एकीकृत माओवादीया अध्यक्ष प्रचण्ड, एमालेया अध्यक्ष झलनाथ खनाल, कांग्रेस संसदीय दलया नेता रामचन्द्र पौडेल नापं स्वंगुलिं हे पार्टीया मेमेपिं नेतातय्सं नं ब्वति काःगु खः ।
संविधानसभाया म्याद फुइत्यंगु अन्तिम इलय् वयाः संविधानसभाया म्याद दछि थपे यायेधुंकाः थौं हे तिनि न्हापांखुसी स्वंगू पार्टीया शीर्ष नेतातय् बैठक च्वंगु खः। मेमेगु मुद्दां यानाः संविधान च्वयेगु ज्या थाति लानाच्वंगु कारणं उकियात निरन्तरता बीत उगु बैठक च्वंगु खःसा स्वंगुलिं पार्टीया नेतातय्सं मेगु विवाद कायम हे जुयाच्वंसां संविधान च्वयेगु ज्या धाःसा मदिकेगु धकाः सहमति दयेकूगु खः। थ्व विषययात अझ विस्तृत रुपं न्ह्याकेत आइतवाः हानं बैठक च्वनेगु धाःगु दु ।
बैठक लिपा संविधानसभा अध्यक्ष नेम्वाङं संचारकर्मीलिसे खँ ल्हासें संविधान निर्माणया प्रक्रिया गनथाय् थ्यनाः दिनाच्वंगु खः वहे थासं हानं शुरु यायेगु खँय् स्वंगुलिं दलया शीर्ष नेतात सहमत जूगु दु धयादिल। उकिं आः संविधान च्वयेगु ज्यायात न्ह्यःने न्ह्याकेगु लागिं याकनं हे संविधान निर्माणया कार्यतालिका दयेकेगु जानकारी नं वय्कलं बियादिल। संविधानया थीथी विषययात कयाः वयाच्वंगु विवादयात नेतात हे च्वनाः ज्यंकेगु बारे नं खँ जूगु जानकारी वय्कलं बियादिल ।
राज्य पुनर्संरचना आयोग व मेमेगु विवादया खँयात प्याकेजं ज्यंकेगु खँ जानकारी नं भाजु नेम्बाङं बियादीगु दु ।
न्ह्याम्ह जूसां स्वीकार: प्रम
येँ(सन्ध्या टाइम्स)/ताः ई न्ह्यःनिसें माओवादी अध्यक्ष प्रचण्डयात प्रधानमन्त्रीया रुपय् स्वीकार याये फइ मखु धया च्वनादीम्ह प्रधानमन्त्री माधवकुमार नेपालं आः न्ह्याम्ह हे प्रधानमन्त्री जूसां थःपिंसं स्वीकार यायेगु जुइ धयादीगु दु। थौं येँय् जूगु छगू ज्याझ्वलय् न्ववासें प्रधानमन्त्री नेपालं स्वंगू दलपाखें सिफारिस जूम्ह न्ह्याम्ह हे जूसां थम्हं प्रधानमन्त्रीया रुपय् स्वीकार यायेगु जुइ धयादीगु खः ।
