प्रधानमन्त्री व सचिव दथुया सहलह

प्रधानमन्त्री माधव नेपालं देय्या प्रशासनिक मामिलायात कयाः फुक्कं मन्त्रालयया सचिवत सःताः सहलह ब्याकादीगु दु। थ्व झ्वलय् प्रमपाखें कर्मचारीं सरकारयात ग्वाहालि मयाःगु गुनासो प्वंकादिलसा सचिवतय्सं कर्मचारीतन्त्रयात अनावश्यक रुपं राजनीतिक दवाव वयाच्वनीगु खँ न्यंकल। देय्या प्रशासनिक यन्त्रया दकलय् तःधंगु पदय् च्वंपिं सचिवतलिसे जूगु थ्व संवादय् गुगु खँत पिहां वःगु खः, व अवश्य नं मनन यायेबहः जू ।

देय्या कर्मचारीतन्त्र अतिकं भ्रष्ट व निकम्मा जूगु खँय् निगू मत मदु। तर थ्व निकाय अथे जूगुया कारण धाःसा राजनीति हे खः। राजनीतिक पार्टीतय्सं कर्मचारीतन्त्रयात भ्रष्ट व निकम्मा दयेकूगु खँय् नं निगू मत मदु। देशय् कर्मचारीया नियुक्ति, सरुवा, बढुवा फुक्क हे ज्याय् राजनीति हावी जुइ। थःगु पार्टीलिसे आवद्धम्ह खःसा वयात बढुवा याइ, नियुक्ति नं याइ। थःगु पार्टीया समर्थक मखुसा योग्य व दक्षम्ह हे खःसां वयात काइ मखु। थुकिं यानाः कर्मचारीतन्त्र मुक्कं हे राजनीतिक पार्टीया गुलाम जुइत बाध्य जुल। आः वयाः ला झन् कर्मचारीतय्सं काइगु कमिशन व घूसया छगू अंश मन्त्रीयात नं वनीगु व मन्त्रीं उकिया छगू अंश पार्टीयात नं बीगु जुयाः कर्मचारीतन्त्रय् जुइगु भ्रष्टाचारया संरक्षण स्वयम राजनीतिक पार्टीपाखें जू वनाच्वंगु दु। थज्याःगु अवस्थाय् कर्मचारीं सरकारयात वास्ता मयाइगु अस्वाभाविक मखु। कर्मचारीतन्त्रय् खने दयाच्वंगु थ्व विकृति चीकेगु खःसा न्हापांगु पलाः राजनीतिक शक्तितय्सं ल्ह्वनेमाः। राजनीतिक इच्छाशक्ति व प्रतिवद्धता दुसा हे जक थ्व ज्या जुइ फइ ।

More Stories Like this