दक्षिण कोरिया मेगू चरणय् / अर्जेन्टिनां मेक्सिकोया सामना याइगु

ग्रुप 'बी' अन्तर्गतया लिपांगु कासाय् दक्षिण कोरियां नाइजेरिया नापया कासा बराबरी यानाः मेगू चरणय् दुहावंगु दु ।

नाइजेरियाया कालु उछें १२औं मिनेट याःगु गोलं अग्रता काःगु खः । तर दक्षिण कोरियाया डिफेन्डरत ली जुङसो व पार्क छुयोङं छगू-छगू गोल यानाः कासायात थःगु पक्षय् हःगु खः । लिपा नाइजेरियाया एजबेनी याकुबां पेनाल्टि मार्फत याःगु गोलं कासायात बराबरीलय् थ्यंकूगु खः ।

नाइजेरिया नापया कासा बराबारी याना: दक्षिण कोरिया ४ अंक सहित ग्रुप 'बी'लय् निगूगु थासय् च्वनेत सफल जुयाः निगूगु चरणय् दुहावंगु दु । आः निगू चरणय् दक्षिण कोरियां ग्रुप 'ए'लय् न्हापांगु स्थान कायेत सफल जूगु उरुग्वेया सामना याइ ।

उखे ग्रुप 'बी' अन्तर्गया हे मेगू कासाय् अर्जेन्टिना ग्रीसयात २-० गोलं पराजीत याःगु दु । न्हापांगु चरणया स्वंगूलिं कासा त्याकाः अर्जेन्टिना ९ अंक सहित ग्रुप 'बी'या न्हापांगु थासय् लाःगु दु । आः निगूगु चरणय् अर्जेन्टिनां ग्रुप 'ए'लय् निगूगु स्थानय् लाःगु मेक्सिकोया सामना याइ ।

ग्रीस नापया कासाय् अर्जेन्टिनाया मार्टिन डेमिचेलिस व मार्टिन पालेर्मों कासाया निगूगु हाफय् याःगु गोल मार्फत थःगु जीत दर्ता याःगु खः । ७७औं मिनेटय् डेमिचेलिसं अर्जेन्टिनाया न्हापांगु गोल याःगु खःसा पालेर्मों ८९औं मिनेटय् निगूगु गोल याःगु खः । पालेर्मों गोल या:गु छुं मिनेट न्ह्यः न्हापांगु पटक राष्ट्रिय टिमया कप्टानी याना म्हितुगु मेसिं गोल यायेत प्रहार याःगु बल पोष्टय् लाना लिहावगु खः ।

अर्जेन्टिना नाप २-० गोलं पराजीत जूगु ग्रीस ग्रुप 'बी'लय् ३ अंक सहित स्वंगूगु थासय् लाना विश्वकप धेंधेंबल्लां पिहावंगु दु ।

More Stories Like this