उरुग्वे व मेक्सिको निगूगु चरणय् / दक्षिण अफ्रिका विश्वकपं पिने

न्हापांगु चरणया लिप्पांगु कासाय् मेक्सिको विरुद्धया कासा त्याकाः उरुग्वे निगूगु चरणय् दुहावंगु दु । उरुग्वे नाप १-० गोलया पराजीत जुसां ग्रुप 'ए'लय् निगूगु स्थान कायेत सफल मेक्सिको नं निगूगु चरणय् दुहावंगु दु ।

उखे आयोजक देय् दक्षिण अफ्रिका धाःसा विश्वकप धेंधेंबल्लां पिहावंगु दु । न्हापांगु चरणया लिप्पांगु कासाय् फ्रान्सयात २-१ गोलं बुकूसां आयोजक देय् मेक्सिको नापया गोल अन्तरया आधारय् धेंधेंबल्ला पिहावंगु दु ।

ग्रुप 'ए' अन्तर्गत न्हापांगु चरणया दक्वं कासा लिपा निगू जीत व छगू कासा बराबरी नापं उरुग्वे ७ अंक सहित न्हापांगु थासय् च्वनेत सफल जूगु दु । मेक्सिको व दक्षिण अफ्रिका छगू कासाय् जीत, छगू पराजीत व छगू बराबरी याना ४ अंक काःगु दु । तर गोल अन्तरया आधारय् मेक्सिको निगूगु व दक्षिण अफ्रिका स्वंगूगु थासय् लाःगु दु । उखे फ्रान्स धाःसा निगू कासाय् पराजीत व छगू बराबरी यानाः लिप्पांगु थासय् लाःगु दु ।

मंगलवाः बहनी जूगु कासाय् लुइस सुआरेजया छगू जक गोलया ग्वाहालिं उरुग्वें मेक्सिकोयात १-० गोलं बुकूगु खः । सन् १९९० लिपा न्हापांगु पटक विश्वकपया निगूगु चरणय् प्रवेश याःगु उरुग्वेया निंतिं सुआरेजं कासाया ४३औं मिनेटय् गोल याःगु खः ।

उखे ग्रुप 'ए' अन्तर्गतया मेगू कासाय् दक्षिण अफ्रिकां न्हापांगु हाफय् निगू गोल यानाः फ्रान्स विरुद्ध अग्रता काःगु खः । दक्षिण अफ्रिकाया निंतिं कासाया १९औं मिनेटय् बोङआनी खुमालो व ३६औं मिनेटय् काटलेगो म्हेलां गोल याःगु खः ।

२५औं मिनेटय् योआन गोयुरकफं सिबायायात फल यायेवं रेडकार्ड दुगुलिं झिम्ह जक कासामिलय् सीमित फ्रान्सया निंतिं निगूगु हाफया ६९औं मिनेटय् रिबेरीया पासय् फ्लोरेन्ट मालोउदां गोल याःगु खः । फ्रान्सयात पराजीत याःसां दक्षिण अफ्रिका निगूगु चरणय् वनेत असफल जूगु दु । आयोजकय् देय् निगूगु चरणय् दुहावने मफुगु थ्व न्हापांगु पटक खः ।

More Stories Like this