एमाले-माओवादी सकारात्मक
स्वंगू दलया शीर्ष नेतातय्गु बैठक च्वनेगु सहमति
येँ (सन्ध्या टाइम्स)/प्रमुख प्रतिपक्षी माओवादी सत्तारुढ एमालेया शीर्ष नेतातय् दथुइ राजीनामा व सहमति कार्यान्वयन यायेगु विषययात कयाः याकनं हे स्वंगू दलया शीर्ष नेतातय्गु बैठक च्वनेगु सहमति जूगु दु ।
थौं सुथय् माओवादी अध्यक्ष प्रचण्डया छेँ नयाँबजारय् घौछि जूगु सहलहया झ्वलय् प्रधानमन्त्री माधव नेपालयात राजीनामा बीकेगु नापं माओवादी, कांग्रेस व एमाले दथुइ वंगु १४ गते चान्हय् जूगु स्वंगू बुँदाया सहमति कार्यान्वयन यायेगु बारे खँ जूगु खः ।
थ्व स्वयां न्ह्यः माओवादीं प्रधानमन्त्रीया राजीनामा मवःतले औपचारिक वार्ता तकं याये मखु धया वयाच्वंगु खः। म्हिगः कांग्रेस व माओवादीया नेतातय् दथुइ जूगु वार्तां छुं हे खँ क्वःछी मफुगु खःसा क्वचाःगु खःसा थौंया मुँज्याय् धाःसा माओवादी व एमालेया नेतातय् वार्ता सकारात्मक रुपं न्ह्याः वंगु खः ।
माओवादी अध्यक्ष प्रचण्ड, वरिष्ठ नेता मोहन बैद्य किरण, सचिव पोष्ट बहादुर बोगटी व एमालेपाखें अध्यक्ष झलनाथ खनाल व वरिष्ठ नेता भरतमोहन अधिकारीया दथुइ थौं वार्ता जूगु खः। वर्तमान राजनीतिक अवस्था नापं समस्या समाधान यानाः वनेगु नितिं एमालेया नेतात प्रचण्ड निवासय् वनाः सहलह ब्याकः वंगु खः। सहलहया झ्वलय् शान्ति प्रक्रिया नापं न्हूगु संविधान निर्माणया झ्वलय् वयाच्वंगु पंगः नं सहमतिया आधारय् हे चीका वनेगु खँय् सहलह जूगु खँ एमाले अध्यक्ष खनालं कनादिल ।
सहलहया झ्वलय् प्रधानमन्त्रीया राजीनामाया सवालयात कयाः एमाले अध्यक्ष खनाल सकारात्मक जुयाः थःपिंसं बिचाः याये धयादीगु खः। अध्यक्ष खनालं नापलाये न्ह्यः थौं हे एमालेया प्यम्ह केन्द्रीय युवा नेतात योगेश भट्टराई, घनश्याम भुषाल, अरुण नेपाल व डा. विजय पौडेलं माओवादी अध्यक्ष प्रचण्डयात नापलानाः सहलह ब्याकूगु खः ।
युवा नेता भट्टराईं 'सन्ध्या टाइम्स' लिसे खँल्हासें माओवादी अध्यक्ष प्रचण्डयात राजनीतिक गतिरोध अन्त्य यायेया नितिं माओवादी दकलय् तःधंगु दलया ल्याखं लचक जुयाः न्ह्याः वनेत थःपिंसं इनाप यानागु व उगु इलय् वय्कलं तसकं सकारात्मक रुपं कयादीगु नापं स्वंगू बुँदाया सहमति कार्यान्वयनया खँय् सहलह जुल धकाः धयादीगु दु ।
आःया अवस्थाय् समस्या समाधान यायेगु नितिं न्हूगु हे कथं वनेमाःगु नापं अविश्वासया संकट जुयाच्वंगुयात चीकेमाःगु नापं उकिया नितिं युवातय्सं भूमिका म्हितेमाः धइगु खँय् नं सहलह जूगु जानकारी भाजु भट्टराईं कनादिल ।
स्वंगू दलया शीर्ष नेतातय् बैठक गबलय् च्वनीगु खः धइगु खँ धाःसा सी मदुनि ।
