सत्ताया निंतिं संघर्ष

कृष्ण प्रजापति

थीथी राजनीतिक पार्टीतय् उद्देश्य व विचार धइगु देश व जनताया सेवाया निंतिं जुइमाःगु खः। तर झीथाय् आः तक नं अज्याःगु राजनीतिक संस्कार ब्वलने फयाच्वंगु मदुनि। थौं तक नं राजनीतिक पार्टीत फुक्कं हे धइथें सत्ता प्राप्तिया निंतिं हे जक संघर्षय् तल्लीन जुयाच्वंगु खनेदु। वास्तवय् सत्ताय् वंसां प्रतिपक्षीइ च्वंसां देश व जनताया हीत व सेवा यायेगु मन दुगु खःसा उलिमछिं पदलोलुप जुइमाःगु आवश्यकता मदु। थःपिंत स्पष्ट रुपं पुँजीवादी कथं नामाकरण यानाच्वंगु पार्टीतय्गु खँ ला छखे हे तये थःत कम्युनिष्ट पार्टी खः धकाः दावी यानाच्वंगु पार्टीतय्सं तकं पुँजीवादी सत्तायात त्वःते फयाच्वंगु मदु। त्यागी, सहयोगी व जनताया दुःख सुखनाप भ्यलेपुने सःपिं अले सुख सुविधाय् लिउने लानाः मेपिंत सुखया सवाः बीगु निंतिं लालायित पुचःयात कम्युनिष्ट धाइ धयागु अन्तर्राष्ट्रिय मान्यता खः। तर वर्तमान नेपाली राजनीतिक पार्टीतय् गतिविधियात ध्यानय् तयाः स्वयेगु खःसा उगु परिभाषा व सिद्धान्त फेल नःगु दु। थन ला त्याग याये धाःगु प्रधानमन्त्री पद छगू त्याग यायेत नं ईब्यः चूमलाःगु व अमेरिकां छु निर्देशन बीगु खः धकाः आज्ञा लनाच्वनेमाःगु अवस्था दु। थुपिं गथे कम्युनिष्ट जुइ?

लोभी, पदलोलुप व नकचरात गबलें कम्युनिष्ट जुइ मखु, उपिं कम्युनिष्ट जूसां कम्युनिष्ट मखु। नेपालय् धाःसा दकलय् अप्वः पदया लागिं ल्वाइपिं नं कम्युनिष्ट जुयाच्वंगु दु। वास्तवय् पुँजीवादी सत्ताय् वनीपिं धइपिं कम्युनिष्ट जुइ फइ मखु। त्यागी, बलिदानी भावना दुपिं मनूतय् पुचः कथं कम्युनिष्ट सिद्धान्त व कम्युनिष्ट पार्टी चायेकीगु खः। आः नेपालय् अज्याःगु परिभाषायात हाचांगायाः ज्या जुयाच्वंगु दु। धायेत थःपिं नं कम्युनिष्ट पार्टी खः धाइ तर पुँजीवादी सत्तां बीगु सुख सुविधायात थः यथें उपभोग याये खनीगु दाउ न्ह्यःने लाकेगु ताः तयाः सत्ता केन्द्रित राजनीतिइ न्ह्यःने वनाच्वनी। सत्ता साझेदारी दल एमालें आः तकं अथे हे यानाच्वंगु दु। नापं माओवादी पार्टीया नामय् पुँजीवादी सत्ताय् लिप्त जुयाः सवाः कायेधुंकूगु राजनीतिक पार्टीं नं अज्याःगु हे परिपाटीया विकास यानाच्वंगु स्थिति दु। थज्याःगु नियतं यानाः थौं देशय् सुं छगू हे पार्टी इमान्दार मदु, कम्युनिष्ट पार्टी धाःसां फुक्कं सत्ताया लागिं हे ल्वाइगु जुयाः फुक्कं बेइमान खःला धइगु भ्रम तकं नेपाली जनताया नुगलय् ब्वलनेगु यानाच्वंगु दु। तर थ्व नं मखु धइगु इतिहासं क्यनाच्वंगु दु ।

राजनीतिक पार्टीतय् दथुइ जूगु सहमति व सहकार्यया बाचा बन्धनत इलय् कार्यान्वयन मजूगु कारणं थौं आपालं थासय् अन्यौल ब्वलनाच्वंगु दु। मूल रुपं लछि न्ह्यः जेठ १४ गते चान्हय् जूगु स्वंगू बुँदे सहमति कथं प्रमया राजीनामा व संविधानसभाया म्याद दछि थपे यायेगु खँ छुं हद तक पूवंसां सेना समायोजन व प्रमया राजीनामाया खँय् अलमल जुयाच्वंगु कारणं आः सुयात न्हूगु प्रधानमन्त्री कथं स्वीकार यायेगु, सेना समायोजन गुकथं यायेगु व माओवादीया प्यंगू मोडालिटी सही खः कि मखु धइगु खँय् तकं राजनीतिक पार्टीतय् दथुइ चिन्तन जुइ फयाच्वंगु मदुनि। सामान्य जनतां मथुइगु कथं राजनीतिक नेतातय् दथुइ दुनं दुनं मेमेगु हे सम्झौता जुइगु व उकियात हे जक प्राथमिकताया धलखय् तयाः मेमेगु पिनें वःगु खँ गौण जुइगु बांमलाःगु परिपाटी विकास जूगुलिं यानाः नं थ्व स्थिति खने दयावःगु खः।
कांग्रेस, एमाले व माओवादीं थःथःपिं हे नेतात न्हूम्ह प्रधानमन्त्री कथं ब्याख्या याना जूगु व छगुलिं मेगु पार्टीयात विश्वास याये मफयाच्वंगु स्थितिइ त्वःते धायेधुंकूगु प्रधानमन्त्री पद तकं त्वःते म्वाःगु अवस्थाय् माधव नेपाल लानाच्वंगु दु। आसें खुला दासें खुला धाये थें अलमल जक यानाः लांलां दांदां शासन सत्ता ल्हातय् लाका तयेगु परिपाटी थ्व स्वयां न्ह्यः नं अभ्यास जुइ हे धुंकूगु खः। वास्तविक मुक्तिया लागिं ल्वायेगु स्वयां सत्ता प्राप्त जुइगु जूसा न्ह्यागु नं सन्धि सम्झौता व गलत शर्त तकं माने यायेत तयार जुइपिं नेतात हे राजनीतिक नेतृत्वय् लानाच्वंगु अवस्थां नं थ्व समस्या ब्वलनाच्वंगु खः। माओवादी दुने प्रचण्ड प्रधानमन्त्री यायेगु कि डा. बाबुराम प्रधानमन्त्री यायेगु धइगु खँय् जक अप्वः सहलह जुयाच्वनीगु, एमाले दुने खनाल प्रधानमन्त्री यायेगु कि केपी ओलीयात हयेगु धइगु खँय् विवाद तक्यना च्वनीगु अले कांग्रेस दुने सुशिल वा रामचन्द्र सुयागु छ्यं तग्वः धइगु जक मापन याना जुइगु इलय् सेना समायोजन यानाः वृहत् शान्ति सम्झौतायात तार्कित निष्कर्षय् थ्यंकेगु ज्या ध्याकुनय् लाःवनीगु स्वाभाविक खः। राजनीतिक पार्टीतय् दथुइ त्याग व बलिदानया भावनाया नमूना थ्व हे खःला?

ज्या पुँजीपति वर्गया हितया लागिं पुँजीपति सत्ताय् वनेगु अले ब्याख्या यायेगु इलय् थःपिं देशय् दकलय् तःधंगु कम्युनिष्ट पार्टी धकाः ब्याख्या याः जुइगु ल्वःगु खँ मखु। भारतया गुप्तचर निकायं तयार यानातःगु कार्यक्रम हे नेपाःया कम्युनिष्ट पार्टीया कार्यक्रम जुइगु, अमेरिकाया इसारा दयेवं न्ह्यागु नं जुइगु अले वर्ग संघर्षयात निस्तेज यायेगु निंतिं केन्द्रीय गुप्तचर विभागया ज्याझ्वःयात स्वीकार यायेगु थेंज्याःगु परिपाटीं देशय् कम्युनिष्ट पार्टीयात च्वन्ह्याकी मखु। बरु वर्तमान शासकीय स्वरुपयात हे गुकथं परिवर्तन यायेगु व छुं जुल धाःसा थःपिं इमान्दार पार्टी कथं दीर्घकालीन संघर्ष व अधिकार प्राप्त यायेगु लँय् निरन्तर न्ह्यचिलाः जनतायात धात्थेंगु मुक्तिया सासः ल्हाके फइगु खः धइगु सोच विचार व ध्यान तयेगु जक कम्युनिष्ट पार्टीया लक्ष्य जुइमाः। भागबन्डाया राजनीतिइ लिप्त जुयाः कन्हय् देशय् गज्याःगु लिच्वः लाइगु खः स्वये ल्यं हे दनि। अथे जुया आः राजनीतिक पार्टीतय् दथुइ सत्ता केन्द्रित राजनीति यायेगु स्वयां नं प्रतिपक्षीइ च्वनाः नं देश व जनताया सेवा याये जिउ धइगु मानसिकता दयेकाः राजनीतिक पार्टीतय्सं इमान्दारीतापूर्वक ज्या याना वनेगु खःसा सत्ताया लागिं जुयाच्वंगु वर्तमान संघर्षया श्रृंखला क्वचाइगुया नापनापं नेपाली जनतां छुं भचा जूसां राहत चूलाके फइगु खइ ।

More Stories Like this