शरणार्थी दिवस व नेपाःया शरणार्थीत

शरणार्थी दिवस नेपालय् नं थीथी ज्याझ्वः यासें नकतिनि हन। नेपाः खास यानाः छगू लाखया ल्याखय् दुपिं भूटानी शरणार्थीया कारणं संकटय् लानाच्वंगु देय् खः। भूटानी शरणार्थीयात लहीमाःगु बोझ ला नेपाःयात मदु अथे खःसां झापाया आपालं लागाय् शिविर दयेकाः शरणार्थीत तया तयेबलय् उकिं ब्वलनीगु वातावरणीय समस्या, सामाजिक विकृतिया समस्या आदिपाखें धाःसा नेपाः पीडित जुयाच्वंगु हे दु। थ्व सिबें नं तःधंगु समस्या धइगु थ्व मुद्दायात नेपालं कुटनीतिक ढंगं ल्ह्वने मसःगुलिसे सम्बन्धित जू। शरणार्थी समस्याया कुटनीतिक समाधान यायेगु शैली मसःगु कारणं नेपालय् गुगु देय्या शरणार्थीत वयाच्वंगु खः उपिंलिसे झीगु स्वापू बांलाये मफु ।

भूटानी शरणार्थी सिबें न्हापां तिब्बती शरणार्थीत वयेगु शुरु जूगु खः। तिब्बती शरणार्थीतय्सं इलय् ब्यलय् नेपाःया भूमि दुने च्वनाः तिब्बत स्वतन्त्रताया माग यासें चीन विरोधी गतिविधि याना बीगु कारणं चीन व नेपाःया स्वापू तकं तःक्वःमछि ख्वाउँसे ख्वाउँसे च्वनावंगु खः। नेपाःयात चीन विरोधी गतिविधि यायेगु थाय् दयेके बी मखु धकाः बचं हे बियातःगु दुसां तिब्बती शरणार्थीतय्सं याइगु गतिविधियात नेपालं पने फुगु मखु। उखे भारतया आसाम व मेघालयय् नं नेपाली मूलया मनूतय्त पितिनेगु शुरु जुल कि उपिं नं अन्तिम शरणया निंतिं नेपाः हे दुहां वइगु जुयाच्वंगु दु। थुकी नं कुटनीतिक पहल यायेत नेपाः असफल जूगु दु। थीथी कारणं विदशी शरणार्थीत देशय् दुहां वइगु छगू समस्या ला ख हे खः तर उकियात हल याये मफइगु झन व स्वयां नं तःधंगु समस्या खः ।

More Stories Like this