पोर्चुगल भारी गोल अन्तरं विजय

न्हापांगु कासाय् ब्राजिल विरुद्ध तुलनात्क रुपं बांलागु कासा म्हितुगु उत्तर कोरियात पोर्चुगलं ७-०या भारी गोल अन्तरं बुकूगु दु । थुगु विश्वकपय् छगू हे कासाय् दकलय् यक्व गोल यासें पोर्चुगलं उत्तर कोरिया विरुद्धया कासायात एकतर्फि रुपं कब्जा याःगु खः ।

सन् २००६या सेमिफाइनलिस्ट पोर्चुगलया निंतिं स्टार कासामि क्रिष्टियानो रोनाल्डोया नापं राउल मेरिलेस, सिमाओ साब्रोसा, हुगो अलमेडा, टिआगो व लेडसनं गोल याःगु खः । २७औं मिनेट तक बराबरीलय् म्हिता च्वंगु कासाय् मेरिलेसं गोल यानाः पोर्चुगलयात अग्रता ब्यूगु खः ।

छगू गोल लिपा कासाय् हावी जुयावःगु पोर्चुगलं न्हापांगु हाफ तक मेगू गोल यायेमपुत । तर निगूगु हाफ सुरु जूगु न्हय्गु मिनेट लिपा गोल यायेगु क्रम सुरु जूगु ख: । पोर्चुगलं उगु गोल यायेगु क्रमयात निरन्तरता ब्यूसें कासाया ८८औं मिनेट तक थप खुगू गोल याःगु खः ।

पोर्चुगलया निंतिं ५२औं मिनेटय् सिमाओं, ५५औं मिनेटय् अलमेडां, ५९औं व ८८औं मिनेटय् टिआगों, ८०औं मिनेटय् लेडसनं व ८६ मिनेटय् रोनाल्डों गोल याःगु खः । कासाय् खुगूगु गोल याःगु रोनाल्डों ५९औं मिनेटय् टिआगोया न्हापांगु गोल यायेत बांलागु पास ब्यूगु खः ।

उत्तर कोरिया नापया विजय लिपा पोर्चुगल ४ अंक सहित ग्रुप 'जी'या निगूगु थासय् थहावंगु दु । थुगु ग्रुपय् ब्राजिल निगूगु कासा त्याकाः ६ अंक सहित न्हापांगु थासय् दुसाः आइभोरि कोस्ट १ अंक सहित स्वंगूगु थासय् दु । उत्तर कोरिया धाःसा निगूलिं कासाय् पराजयया सवाः कयाः अंक रहित प्यंगूगु थासय् दु । आः तक म्हितुगु निगुलिं कासा बुइवं उत्तर कोरिया विश्वकपं पिहावंगु दु ।

More Stories Like this