थौं सुथंनिसें देउवाया भेला
माओवादी व कांग्रेसया वार्ता निष्कर्षविहिन
येँ (सन्ध्या टाइम्स)/प्रधानमन्त्री पदय् वनेगु लागिं कांग्रेस दुने न्ह्यानाच्वंगु दौडधुपया झ्वलय् कांग्रेसया वरिष्ठ नेता शेरबहादुर देउवां थौं थः समर्थक सभासद् नापं केन्द्रीय नेतातय्गु छगू ब्यागलं भेला यानादीगु दु ।
देउवा समर्थक सभासद् चक्रबहादुर ठकुरीया जोरपाटीस्थित छेँय् उगु भेला जूगु खः। नेपाली कांग्रेसया आः न्ह्यानाच्वंगु बैठकय् प्रधानमन्त्रीया पदय् थःत सिफारिस यायेमाः धकाः याःगु इनापयात कार्यवाहक सभापति सुशील कोइरालां अस्वीकार यायेवं नेता देउवां थौं थःपिनि बिस्कं भेला सःतादीगु खः। उगु भेलाय् वय्कलं आः थःपिं गुगु कथं न्ह्याः वनेगु नापं पार्टीइ थःगु पक्षय् गय् यानाः समर्थन कायेगु धकाः सहलह यायेत थौंया भेला सःतूगु खँ नं धाःगु दु।
कांग्रेसया तःन्हु न्ह्यवंनिसें न्ह्याःगु केन्द्रीय बैठकय् भावी प्रधानमन्त्रीया रुपय् संसदीय दलया नेता रामचन्द्र पौडेलयात ल्ययेगु ला कि वरिष्ठ नेता शेरबहादुर देउवायात ल्ययेगु धइगु खँय् विवाद ब्वलनाच्वंगु खः। कार्यवाहक सभापति कोइरालां धाःसा नेता ल्ययेगु खँय् पार्टीया थःगु हे पद्धति दुगुलिं वहे कथं न्ह्यायेगु जुइ धयादीगु दु ।
कार्यवाहक सभापति कोइरालां म्हिगः सार्वजनिक रुपं हे संसदीय दलया नेतायात हे प्रधानमन्त्री दयेकेगु जुइ धकाः अभिब्यक्ति बियादीवं भाजु देउवा हीमीचाःगु खः। कोइरालाया अज्याःगु अभिव्यक्ति वयेवं वय्कलं आः थःपिं गय् यानाः न्ह्यायेगु धकाः सहलह यायेत थौंया बैठक सःतादीगु खः ।
नेता देउवां तत्कालिन अवस्थाय् नेपाली कांग्रेस व प्रजातान्त्रिक कांग्रेस एकीकरण जूगु नापं अबलेनिसें मदुम्ह गिरिजाप्रसाद कोइराला धुंकाः थःत वरिष्ठ नेता नालातःगु जूसां आः वयाः उकियात वेवास्ता यात धकाः आपत्ति प्वंकादीगु खः ।
उखे प्रधानमन्त्री पदया मेम्ह दावेदार भाजु रामचन्द्र पौडेलं नं थःगु पक्षय् समर्थन कायेगु लागिं थौं माओवादी नेतातय्त नापलानादीगु दु। थौं वय्कलं प्रमुख प्रतिपक्षी एकीकृत माओवादीया शीर्ष नेतातय्त नापलानादीगु खः। माओवादी संसदीय दलया ज्याकुथी जूगु उगु वार्ताय् माओवादीं यदि प्रधानमन्त्री माधव नेपालया राजीनामा कायेगु खःसा कांग्रेसं नं दवाव बी माल धकाः इनाप याःगु खःसा कांग्रेस पक्षं न्हापां सहमतिया सरकार दयेकेगु निंतिं थःगु नेतृत्वयात माओवादीं स्वीकार यायेमाःगु प्रस्ताव तःगु खः। तर निगुलिं पार्टीया प्रस्तावय् निगुलिं सहमति जुइ मफयेवं वार्ता निष्कर्षहिन जूगु खः। मुँज्याय् कांग्रेसपाखें नेता पौडल नापं मेपिं नं दीगु खःसा माओवादीपाखें नं थीथी नेतात दीगु खः ।
