'धर्म निरपेक्षता आः हानं लिहां वनी मखुत'

धर्मोदय सभाया बौद्ध भेला

येँ (सन्ध्या टाइम्स)/संविधानसभाया अध्यक्ष सुभाष नेम्बाङं देय् छगुलिं हे धर्म निरपेक्षता व संघीय लोकतान्त्रिक गणराज्यय् वनेधुंकूगु अवस्थाय् हाकनं लिफःतुलाः लिउने पाखे वनी मखु बरु अझ न्ह्यःनेपाखे हे न्ह्याः वनीगु विश्वास प्वंकादीगु दु। धर्मोदय सभाया ग्वसालय् जूगु वृहत् बौद्ध सभाया उलेज्या यासें वय्कलं थ्व खँ धयादीगु खः ।

स्वंगुलिं तःधंगु राजनीतिक दलतय्सं धर्म निरपेक्षताया पक्षय् प्रतिवद्धता प्वंकेधुंकूगु खँ कनादिसें वय्कलं आः थुकियात संस्थागत यायेत नं वय्कःपिंत इनाप यानादिल। लिसें वय्कलं इलय् हे संविधान च्वये मफयाः संविधानसभाया ई दछि तनेमाःगु खँय् नं नुगः मछिंकादिल।
एनेकपा (माओवादी) या सभासद् सुरेश आलेमगरं संघीयतां देय् कुचा जुइ मखु धासें भारत व स्वीट्जरल्याण्डया दसु न्ह्यब्वयादिल। थःगु पार्टी पूर्ण रुपं हे धर्म निरपेक्षताया पक्षय् वनेधुंकूगु खँ कँसें यदि सुनां नं धर्म निरपेक्षताया विरोध यात धाःसा वयागु गणतन्त्र प्रतिया विश्वासय् तकं न्ह्यसःचिं दनीगु खँ नं वय्कलं कनादिल ।

एमाले स्थायी समितिया दुजः भरतमोहन अधिकारीं गथे देशय् आः राजतन्त्र लिहां वइ मखुत अथे हे धर्म निरपेक्षताया नं अन्त्य जुइ मखुत धासें नेपाः छगू बहुभाषिक, बहुजातीय व बहुधार्मिक देय् जूगु कारणं थ्व देय्या लागिं धर्म निरपेक्ष नीति हे पाय्छि जू धयादिल ।

नेपाली कांग्रेसया नेता आनन्द प्रसाद ढुंगानां बुद्ध जन्म जूगु देय् धर्म निरपेक्ष मजुल धाःसा त्वाःदेवां क्वय् मतं मखः थें जुइ धासें थःपिनि पार्टी पूर्ण रुपं धर्मनिरपेक्षताया पक्षय् दु धयादिल ।

जनजाति आन्दोलनया नेता एवं कांग्रेस सभासद् इन्द्रबहादुर गुरुङ्गं आः धर्म निरपेक्षतायात सुनां नं लिउने यंकेगु कुतः यात धाःसा उकिं बांमलाःगु लिच्वः पिकाइगु ख्याच्वः बियादिल ।

उद्योगपति एवं सभासद् पद्मज्योतिं २०५८ सालया जनगणताय् दुर्नियतपूर्वक बौद्धतय् ल्याः क्वपाला तःगु खनेदु धासें आः जुइगु जनगणनाय् सत्य तथ्यांक पिहां वइगु जुइ धकाः आशा व्यक्त यानादिल। वय्कलं धर्म निरपेक्षताया विरोध यायेगु धइगु छगू फोहोरी मानसिकताया लिच्वः खः धासें अज्याःपिंप्रति समुदाय हे सतर्क जुइमाःगु बिचाः प्वंकादिल ।

लुम्बिनी विश्वविद्यालयया उप कुलपति डा. त्रिरत्न मानन्धरं लुम्बिनी विश्वविद्यालययात वज्रयान, महायान व थेरवाद स्वंगुलिं यानया मंकाः अध्ययन केन्द्र दयेकेगु ताः तयागु खँ कनादिल ।

धर्मोदय सभाया नायः पं. बद्रिरत्न वज्राचार्यया सभापतित्वय् जूगु उगु ज्याझ्वलय् न्वकु लक्ष्मीदास मानन्धरं आः जुइगु राष्ट्रिय जनगणनाय् सकलें बौद्धत सतर्क जुइमाःगु बिचाः प्वंकादिल ।

ज्याझ्वलय् धर्मोदय सभायात ताः इलंनिसें थीथी कथं ग्वाहालि याना वयाच्वंपिं थीथी व्यक्तितय्त हनेगु ज्या नं जूगु खः। ज्याझ्वलय् संघनायक भिक्षु बुद्धघोष महास्थविर, नीलविर सिं कंसाकार, त्रिरत्नमान तुलाधर नापं स्वयम्भु चैत्यय् लुं सीगु ज्याया दाता मय्जु गेलेक छिरिङ्गयात नं दोसल्लां न्ययेकाः हनेगु ज्या याःगु खः। ज्याझ्वलय् धर्म निरपेक्षता आन्दोलनया आपालं कार्यकर्तातय् उपस्थिति दुगु खः ।

More Stories Like this