खुँलँपुं बजेट हयेगु प्रमया तयारी

न्हूगु बजेट हयेत जुयाच्वंगु अलमल चीकेगु लागिं प्रधानमन्त्री माधव नेपाल थ्व इलय् अवैध लुखादुवाःत माः जुयाच्वंगु संकेत वःगु दु। यदि असार ५ गते तक नं संसदया अधिवेशन सःते मफुत धाःसा न्हूगु बजेट हये फइ मखु धकाः सभामुख सुभाष नेम्बाङं तप्यंक हे धाःसां नं सरकारं धाःसा उकियात वेवास्ता यासें मेगु हे लँपुं बजेट हयेगु कुतः यानाच्वंगु खनेदु। उकिया लागिं प्रधानमन्त्री माधव नेपालं कानूनविद्तलिसे सहलह ब्याकादीगु दु। सम्भवतः अध्यादेशपाखें बजेट हयेगु वय्कःया बिचाः जुइमाः। उकिं वय्कलं अध्यादेशं बजेट हल धाःसा उकिं कानूनतः गज्याःगु समस्याया सामना याये माली धकाः बिचाः ब्याकेत कानूनविद्तलिसे सल्लाह यानादीगु खः। सम्भवतः वय्कःयात कानूनविद्तय्सं उकथं बजेट हःसां जिउ धकाः सुझाव बिल नं जुइमाः। तर खुँलँपुं बजेट हयेगु ज्या कानूनतः पाय्छि खःसां राजनैतिक व नैतिक निगुलिं दृष्टिकोणं पाय्छि धाःसा मखु। संसदय् थःगु बहुमत दयेक दयेक नं बजेट तक नं अन पेश याये मफइगु खःसा थ्व सरकारया तःधंगु कमजोरी खः। अध्यादेशं बजेट हयेगुया अर्थ तप्यंक हे विपक्षीं सदनय् याइगु विरोधयात छले यायेगु खः। यदि विपक्षीयात थज्याःगु खुँलँपुं छले यायेगु खःसा सदन छु याये माल? संसदीय व्यवस्थाया थ्व ति तःधंगु बेइज्जत मेगु छु जुइ?

प्रधानमन्त्रीं बजेट हयेगु लागिं थज्याःगु लँपु मालेगु ज्या बन्द यानादीसां जिउ। वय्कलं विपक्षीया चित्त बुझे यानाः वैध लँपुं हे बजेट हयेगु स्वयेमाः। यदि बजेट हये मफइगु खःसा सत्ता त्वःता वनेमाः। थ्वहे जक विकल्प वय्कःयाके दु ।

More Stories Like this