ब्राजिल निगूगु चरणय्

आइभोरी कोस्ट नाप ३-१ गोलया विजय नापं न्याक्वः तकया विश्वकप च्याम्पियन जुइधुंकूगु ब्राजिल थुगुसिया विश्वकपया निगूगु चरणय् प्रवेश याःगु दु । ग्रुप अफ डेथ धकाः कयातःगु ग्रु 'जी' अर्न्तगत आ: तक जूगु निगूलिं कासा त्यकाः ब्राजिल ६ अंक सहित मेगू छगू कासा म्हिते ल्यं दुगु इलय् हे निगूगु चरणय् प्रवेश याःगु खः ।

सोमवाः चान्हय् जोहानसबर्गया सकर सिटी रंगशालाय् जूगु कासाय् ब्राजिलियन लुइस फाबियानोया निगू गोल व इलानोया छगू गोल याःगु खः । आइभोरि कोस्टया निंतिं धाःसा छगू जक सान्त्वना गोल कप्तान ड्रोग्बां याःगु खः ।

काकाया पासय् फाबियानों कासाया २५औं मिनेटय् न्हापांगु गोल याःगु खःसा फोबियानो हे ५०औं मिनेटय् निगूगु गोल नं याःगु खः । उगु गोल यायेगु इलय् फाबियानोया ल्हातं थिउगु खःसां रेफ्ररीं उकीयात गोलया मान्यता ब्यूगु खः ।

६२औं मिनेटय् नं काकाया पासय् इलानों ब्राजिलया निंतिं स्वंगूगु गोल याःगु खः । थम्हं गोल यायेमफुसां मेपिंत बांलागु पास यायेत सफल जूगु काका निगू यल्लो कार्ड ब्यूगु बापत लिपा मैदान त्वतेमाःगु खः ।

न्हापाया इंग्ल्याण्डया कोच गोरान इरिक्सनया कोचिङय् मैदानय् कुहांवगु आइभोरि कास्टया निंतिं कासाया ७९औं मिनेटय् ड्रोग्बां छगू जक गोल याःगु खः ।

More Stories Like this