पाराग्वे विजयी / डिफेन्डिङ च्याम्पियन इटालीया मेगू कासा नं बराबरी

स्लोभाकिया विरुद्ध आइतवाः जूगु कासा त्याकाः पाराग्वे विश्वकपया निगूगु चरणया नापं थ्यंगु दु । न्हापांगु कासा डिफेन्डिङ च्याम्पियन इटालि नाप १-१ गोलया बराबरी याःगु पाराग्वें स्लोभानिया विरुद्ध आक्रामक रुपं प्रस्तुत जुयाः निगू गोल याःगु खः ।

फ्री स्टेट रंगशालाय् जूगु कासाय् इर्निके भेरा व क्रिष्टियान रिभरोसं छसिकथं २६औं व ८५औं मिनेटय् गोल याःगु खः । सन् १९९३य् चेकोस्लाभिका पाखें विभाजन जुइधुंकाः न्हापांगु विश्वकप म्हितुगु स्लोभाकियायात पाराग्वें कासाया अधिकांश ई दबावय् तःगु खः ।

पाराग्वेया दबावय् लागुलिं रक्षात्मक कासा म्हितेत बाध्य जूगु स्लोभाकियां कासाय् गोल यायेत छक्व जक बांलागु प्रहार याःगु खः । पाराग्वेया निंतिं धाःसा सान्टा क्रुज, भेरा लगायतं थप गोल यायेत बांलागु प्रहार याःगु बलयात स्लोभाकिया गोलकिपरं बचे याःगु खः ।

स्लोभाकिया विरुद्ध थुगु कासा त्याकाः पाराग्वे ४ अंकया साथ ग्रुप 'एफ'या न्हापांगु थासय् लाःगु दुसाः डिफेन्डिङ च्याम्पियन इटालीं थौंया कासा नं बराबरीलय् म्हिता २ अंक सहित निगूगु थासय् च्वनेत बाध्य जूगु दु ।

फिफाया वरियता क्रमय् ७८औं स्थानय् दुगु न्युजिल्याण्डं इटालीयात बराबरीलय् पनेवं इटालीयात निगूगु चरणय् दुहांवनेत मेगू कासा त्याके हे माःगु दु । उखे बिहीवाः जुइगु कासाय् न्युजिल्याण्डं पाराग्वेयात बुकूसाः न्युजिल्याण्ड नं मेगू चराणय् दुहांवनीगु सम्भावना दु ।

आइतवाः इटाली व न्युजिल्याण्डया कासा सुरु जूगु ६औं मिनेटय् हे न्युजिल्याण्डं गोल यानाः डिफेन्डिङ च्याम्पियन विरुद्ध अग्रता काःगु खः । न्युजिल्याण्डया सिमोन इलियोटं क्येकूगु फ्री किक प्रहार बचे यायेत इटालीयन कप्टान फाबियो कानाभारों गल्ती यायेवं उकीया बांलागु सदुपयोग यासें शेन स्मेल्टजं गोल याःगु खः ।

कासाया २८औं मिनेटय् न्युजिल्याण्डया टमी स्मिथं इटालीया रोसीयात डि बक्स दुने याःगु फलया पलेसा दुगु पेनाल्टीलय् भिन्सेन्जो लाक्युनतां गोल यानाः कासायात बराबरीलय् हःगु खः । लिपा निगूलिं टिमं थप गोल यायेमफेवं कासा १-१या बराबरीलय् क्वचाःगु खः ।

More Stories Like this