'धन्दा कायेम्वाः प्रधानमन्त्रीजु'
येँ (सन्ध्या टाइम्स)/नेपाली कांग्रेस संसदीय दलया नेता रामचन्द्र पौडेलं प्रधानमन्त्री माधव नेपालयात नापलानाः छुं नं कथंया धन्दा कायेम्वाः, याउँक सरकार न्ह्याकादिसँ धकाः हःपाः बियादीगु दु ।
भाजु पौडेल थौं सुथय् वालुवाटार वनाः प्रम नेपालयात नापलाना उगु आश्वासन बियादीगु खः। वर्तमान सरकार बहुमत दुगु सरकार जूगुलिं प्रधानमन्त्रीं छुं नं धन्दा कायेम्वाःगु व कांग्रेसया समर्थन पूर्ण रुपं हे वर्तमान सरकारयात दु धकाः नं नेता पौडेलं धयादीगु खः। वय्कलं निर्विवाद रुपं थःगु नियमित ज्या न्ह्याकेत नं प्रम नेपालयात इनाप यानादीगु खँ धाःगु दु ।
भाजु पौडेलं थ्वहे सरकारं संसदय् न्हूगु बजेट व सरकारया नीति तथा कार्यक्रम हयेमाःगु नापं उकिया नितिं कांग्रेसं पूर्ण समर्थन याइ धकाः नं धयादीगु खः। लिसें वय्कलं बजेट अधिवेशन याकनं हे सःतेत नं प्रधानमन्त्रीयात इनाप यानादीगु खँ सूत्रं धाःगु दु ।
प्रमयात नापलानाः पिहां वयेवं सञ्चार माध्यमलिसे खँ ल्हासें नेता पौडेलं वर्तमान प्रधानमन्त्री माधव नेपालयात राजीनामा बीगु निंतिं थःपिंसं गुगुं हालतय् नं दबाव बीगु जुइ मखु व अज्याःगु दवाव वंगु नं मदु धयादिल। वय्कलं थौं राष्ट्रिय सहमति व स्वंगू दल दथुइ जूगु स्वंगू बुँदाया सहमति कार्यान्वयन यायेगु, प्रमुख प्रतिपक्षी माओवादीं याये धाःगु आन्दोलन नापं मेमेगु विषयय् नं प्रधानमन्त्रीलिसे सहलह जूगु जानकारी बियादिल ।
थ्वहे दथुइ नेपाली कांग्रेसया केन्द्रीय बैठक थौं च्वनीगु जूगु दु। वर्तमान सरकारया विकल्प व समसामयिक राजनीति बारे सहलह यायेत थौं कांग्रेसया बैठक च्वनेत्यंगु खः। छुं न्हि न्ह्यवंनिसें न्ह्यानाच्वंगु कांग्रेस बैठकय् अप्वः नेतातय्सं वर्तमान सरकारयात हे निरन्तरता बीमाःगु व छुं जुयाः न्हूगु सरकार दयेकेगु अवस्था वल धाःसा कांग्रेसं हे नेतृत्व यायेमाः धकाः सः तया वयाच्वंगु दु। कांग्रेस दुने संसदीय दलया नेता रामचन्द्र पौडेल, वरिष्ठ नेता शेरबहादुर देउवा व कुलबहादुर गुरुङ्गं प्रम पदया दावी यानाच्वंगु दु ।
