कांग्रेसं नं मिखा तल न्हूगु सरकारय्

सरकार गठन यायेगु ज्याय् पिहां वःगु अलमलया झ्वलय् आः नेपाली कांग्रेसया नेतृत्वय् सरकार दयेके मालीगु स्थिति खने दया वःगु दु। खतुं थ्व इलय् नेपाली कांग्रेस सरकार चले यायेगु पक्षय् मदु। अथे खःसां छखे देय्या राजनीतिक अवस्था व मेखे उगु पार्टीया छुं वरिष्ठ नेतातय्के ब्वलंगु सत्ताय् वनेगु लोभं कांग्रेसं हानं छक्वः सरकारया नेतृत्व याये मालीगु स्थिति वःगु खः। यदि कांग्रेसं थःपिं हे सरकारय् वनेगु धकाः निर्णय यात धाःसा माओवादीं विरोध हे मयाःसां नं वर्तमान सरकार क्वःदलीगु निश्चित दु। वयां लिपा कांग्रेस व एमाले गठबन्धनया मेगु सरकार वइगु जुइ ।

वास्तवय् थौंकन्हय् एमालेयात सरकारय् व माओवादीयात विपक्षीइ तयाः कांग्रेसं तःधंगु लबः कयाच्वंगु दु। एमाले व माओवादी निगुलिं वामपन्थी पार्टी खःसां उमित छथाय् मतयेगु लागिं कांग्रेसं थ्व छगू बांलाःगु रणनीति ज्वनातःगु खः। एमाले व माओवादी निगू वाम शक्तियात अलग अलग यानातये फत्तले कांग्रेसयात तःधंगु फाइदा दइ। वास्तवय् थौंकन्हय् कांग्रेसं वहे फाइदा कयाच्वंगु खः। छुं जुयाः कांग्रेस थःहे सरकारय् वन धाःसा सरकारय् मदुपिं एमाले व माओवादी निगुलिं पार्टी हानं छथाय् च्वं वनीगु सम्भावना अप्वयेफु। हानं कांग्रेसया इतिहास स्वयेगु खःसां नं थ्व पार्टी गबलय् गबलय् सत्ताय् वनी अबलय् अबलय् अन दुनेया आन्तरिक कचवं तच्वःगु खनेदु। आः नं कांग्रेस सत्ताय् वन धाःसा गिरिजाप्रसाद मदयेधुंकाः नं पिहां मवसे ल्यनाच्वंगु गुगु द्वन्द्व खः व फुक्क पिहां वइगु खतरा दु। कांग्रेसया छुं नेतातय्सं अझ नं थःपिं सरकारय् वने मजिउनि धकाः बिचाः बियाच्वंगुया मू कारण थ्वहे खः ।

More Stories Like this