क्यामरुन विश्वकपं पिने

आइतवाः चान्हय् जूगु कासाय् डेनमार्क नाप २-१ गोल बुइवं क्यामरुन थुगुसीया विश्वकपया समूह चरणं हे पिहांवनीगु न्हापांगु राष्ट्र जूगु दु । थुगु दँया अफ्रिकन कासामि स्यामियुल इटोया गोलं अर्गता काःसां डेनमार्कं लिपा याःगु निगू गोलया कारणं क्यामरुन विश्वकपं पिहांवनेत वाध्य जूगु खः ।

कासाया १०औं मिनेटय् हे इटों क्यामरुनया निंतिं गोल याःगु खःसा ३३औं मिनेटय् बेन्डटनं गोल यानाः कासायात बराबरीलय् हःगु खः । लिपा निगूगु हाफया ६१औं मिनेटय् रोमेदालं गोल यानाः डेनमार्कयात अग्रता ब्यूगु खः ।

ग्रुप 'डी' अर्न्तगत नेदरल्याडं निगूलिं कासा त्याकाः ६ अंक सहित ग्रुपया न्हापांगु थासय् दुसाः जापान व डेनमार्क छगू-छगू कासा त्याकाः ३ अंक कयाः निगूगु व स्वंगूगु थासय् दु । जापान गोल आधारय् ल्यख्यय् डेनमार्क स्वयां च्वयेगु दु ।

क्यामरुन धाःसा निगुलिं कासा बुगुलिं अंक रहित जुयाः ग्रुपया लिप्पांगु थासय् दु । नेदरल्याड लिपाः आः थुगु ग्रुपं मेगू चरणय् दुहांवनीगु टिमया निर्णय जापान व डेनमार्क दथुइ बिहिवाः जुइगु कासां निर्धारण याइ । जापानयात उगु कासा बराबरी जक याःसां पर्याप्त जुसाः डेनमार्कयात धाःसा स्पष्ट जीतया आवश्यकता दु ।

More Stories Like this