नेदरल्याण्ड पाखें जापान पराजित / अष्ट्रेलिया व घाना बराबरीइ

नेदरल्याण्डं एसियन पावर हाउस जापनयात १-० गोलं पराजित याःगु दु । शनिवाः ग्रुप 'इ' अर्न्तगतया कासाय् नेदरल्याण्डया वीस्ले स्नाइदरया छगू जक गोलया ग्वाहालिं जापानयात बुकूगु दु ।

डरबानया मोसेस माभिडा रंगशालाय् जूगु कासाया ५३औं मिनेटय् भान पर्सीया पासय् स्नाइदरया शक्तिशाली प्रहार गोलय् परिणत जूगु खः । इन्टर मिलानया स्टार कासामिं जापान विरुद्ध याःगु थुगु गोलं स्नाइदरं अन्तर्राष्ट्रिय कासाय् गोल याःगु ल्या १५ थ्यंगु दु ।

नेदरल्याण्ड आक्रामक कासाया निंतिं नांजागु धाःसां जापानी रक्षापंक्तिं नेदरल्याण्डयात गोल यायेत थाकुइकाः ब्यूगु खः । नेदरल्याण्डया निंतिं गोल यायेगु छगू बांलागु ह्वताः भान पर्सी सितिकं छ्वःगु खः । उखे जापानया निंतिं योसिथो ओकुबों क्येकूगु छगू गोलयात नेदरल्याण्डया गोलकिपरं बचे याःगु खःसा मेगू पोष्ट स्वयां च्वये वंगु खः ।

अथेहे शनिवाः जूगु ग्रुप 'डी' अर्न्तगत अष्ट्रेलिया व घाना दथुइया कासा १-१ गोलया बराबरीलय् क्वचाःगु दु । ११औं मिनेटय् अष्ट्रेलियन ब्रेट होलमानं गोल यानाः कासाय् अग्रता काःगु खःसा उकीया झिंप्यंगू मिनेट लिपा हे घानाया आहमो ज्ञानं पेनाल्टि मार्फत याःगु गोलं कासायात बराबरीलय् हःगु खः ।

कासा सुरु जूगु छुं ई लिपा हें अष्ट्रेलियन कासामि किवेलयात रेड कार्ड बिवं झिम्ह जक कासामिलय् सिमित जुसां अष्ट्रेलियां बालांगु प्रदर्शन याःगु खः । झिम्ह जक कासामि दुसां घानायात दबावय् तयेत सफल जूगु अष्ट्रेलियां निगूगु हाफय् गोल यायेगु ह्वताःयात बांलाक सदुपयोग यायेमफेवं कासा १-१या बराबरीलय् क्वचाःगु खः ।

More Stories Like this