इंग्ल्यान्डया यात्रा संकटय्

न्हापांगु कासाय् अमेरिका नाप १-१ गोलया बराबारी कासा म्हितुगु इंग्ल्यान्डया निगूगु कासा नं बराबरीलय् क्वचाःगु दु । शनिवाः चान्हय् जूगु कासाय् अल्जेरियां इंग्ल्यान्डयात ०-० बराबरीलय् पंगु खः । निगूलिं कासाय् बराबरी या:गु इंग्ल्यान्डया विश्वकप यात्रा संकटय् लाःगु दु ।

इंग्ल्यान्डया गोल रहित कासा लिपा केप टाउन रंगशालाय् जूगु कासा स्वयेत वःपिं इंग्ल्यान्डया राजकुमारत ह्यारी व विलियम नापं तःधंगु ल्याख्य् दुगु इंग्ल्यान्डया समर्थकत निराश जूगु खः । स्टार कासामित दुथ्याःगु इंग्ल्यान्डया अग्रपंक्तिया कासामितय्सं छुं चमाटकार क्यनेमफेवं कासा गोल रहित बराबरीलय् क्वचाःगु खः ।

ग्रुप 'सी' अर्न्तगतया दक्वं टिमं निगू-निगू कासा म्हिते धुंकाः स्लोभानिया ४ अंकया साथ न्हापांगु स्थानय् दुसाः अमेरिका व इंग्ल्यान्ड निगू व स्वंगूगु स्थानय् दु । निगू-निगू कासा बराबरीलय् म्हिताः अमेरिका गोल अन्तरया आधारय् निगूगु थासय् दुसाः इंग्ल्याण्ड स्वंगूगु थासय् दु ।

इंग्ल्यान्डं आः निगूगु चरणय् वनेत समूह चरणया लिप्पांगु कासाय् स्लोभानिया नाप स्पष्ट रुपं त्याकेमाःगु आवश्यकता दु । समूह चरणया लिप्पांगु कासाय् अमेरिकां अल्जेरिया नापया कासा त्याकूसाः अमेरिका निगूगु चरणय् दुहांवनी ।

More Stories Like this