सर्बिया पाखें जर्मनी पराजित / अमेरिका स्लोभानिया नाप बराबरीइ

सन् २०१०या विश्वकपय् म्हितुगु न्हापांगु कासाय् शान्दार प्रर्दशन यासें अष्ट्रेलियायात ४-० गोलं बकूगु जर्मनी सर्बिया नाप पराजित जूगु दु । थुगुसीया विश्वकपया छगू दाबेदार कथं कयातःगु जर्मनीयात बुकेत सर्बियाया मिला जोभानोभिकया छगू जक गोलं निर्णय भूमिका म्हितल ।

कासाया ३७औं मिनेटय् जर्मनीया मिरोस्लाभ क्लोजयात रेडकार्ड ब्यूगु छगू मिनेट लिपा हे जोभानोभिकं सर्बिया निंतिं गोल याःगु खः । निगूगु म्हासूगु कार्ड क्यंगुलिं जर्मनीया स्टार कासामि क्लोजं मैदान त्वतेमाःगु खः ।

स्वक्वः तक विश्वकपया उपाधि त्याकेत सफल जूगु जर्मनीया निंतिं ६०औं मिनेटय् लुकास पाडोल्स्कीं क्येकूगु पेनाल्टी सितिकं वनेवं जर्मनीं कासायात बराबरीलय् ह्येमफुगु खः । पोडोल्स्कीं याःगु कमजोर प्रहारयात सर्बिया गोलकिपर भ्लाडिमिर स्टोजकोभिकयात बचे यायेत थाकुमजुल ।

युगोस्लाभिया पाखें स्वतन्त्र राष्ट्र जइधुंकाः सर्बियां विश्वकपया कासा त्याकूगु थ्व न्हापांगु पटक खः ।

अथेहे मेगू कासाय् स्लोभानिया नाप बराबरीया कासा म्हितेत संयुक्त राज्य अमेरिकायात संघर्ष यायेमाल । निगूगु हाफय् याःगु निगू गोलया ग्वाहालिं अमेरिकां स्लोभानियायात २-२ गोलया बराबरीलय् थ्यंकूगु खः ।
निगूगु हाफय् अमेरिकी लेण्डन डोनोभान व माइकल ब्राड्लीं याःगु आक्रामक गोलया कारणं विश्वकपया मेगू राउण्डय् दुहांवनेगु अमेरिकया आशा अझ ल्यंगु दु ।

थुगुसीया विश्वकप म्हिताच्वंगु देय्त मध्ये दकलय् चीधंगु राष्ट्र स्लोभानियां न्हापांगु हाफय् निगू गोल यानाः अमेरिका विरुद्ध २-० गोलया अग्रता काःगु खः । कासाया १३औं मिनेटय् स्लोभानियाया भल्टार विर्षा व ४२औं मिनेटय् ज्लाटान लुविआनिकं गोल याःगु खः ।

कासाया अधिकांश ई स्लोभानियाया दबावय् लाःगु अमेरिकाया निंतिं ४८औं मिनेटय् डोनोभान व ८२औं मिनेटय् ब्राड्लीं गोल याःगु खः । डोनोभानया फ्री किकय् जोजी अल्टिडोरया हेडिङ पासयात ८६औं मिनेटय् म्याउरिस इड्युं प्रहार याःगु बल पोष्ट दुने दुहावंगु खःसां मालीया रेफरी कोमान क्वउइलिबालीं इड्युया प्रहार स्वयां न्ह्यः फल बिवं अमेरिकां स्लोभानिया विरुद्धया कासाय् २-२ गोलया बराबरीलय् सन्तुष्ट जुइमाःगु खः ।

More Stories Like this