गोन्जालोया ह्याट्रिकं अर्जेन्टिना विजयी / ग्रीसया न्हापांगु विजयी

गोन्जालो हाइगुनया ह्याट्रिकया ग्वाहालिं अर्जेन्टिनां दक्षिण कोरियायात ४-१या गोल अन्तरं बुकूगु दु । गोन्जालोया स्वंगू गोल व अर्जेन्टिनाया स्टार कासामि लियोनल मेसिया शान्दार प्रर्दशनं अर्जेन्टिनां थुगु विश्वकपा निगूगु कासा त्याका ग्रुप 'बी'या न्हापांगु स्थानय् हे च्वनेत सफल जूगु दु ।

कासाया १७औं मिनेटय् मेसिं क्येकूगु फ्री किक दक्षिण कोरियाया पार्क छुयोङया तुतिइ लाना अत्माघाति गोल जूगु खः । लिपा म्याक्सि रोड्रिगेजया क्रसय् निकोलस बुरडिसों ब्यूगु पासयात गोन्जालों ३३औं मिनेटय् गोल याना २-०या अर्गता काःगु खः ।

न्हापांगु हाफया इन्जुरी इलय् अर्जेन्टिनाया रक्षापंक्तिया कासमितय् गल्तीया फाइदा कासें ली छुङयोङं गोल यानाः कासायात बराबरी पाखे यंकेत स्वःगु खः । तर निगूगु हाफया ७६औं व ८०औं मिनेटय् गोन्जालों हानं मेगू निगू गोल यानाः अर्जेन्टिनां कासायात एकतर्फी रुपं कब्जा याःगु खः ।

सकर सिटी रंगशालाय् तःधंगु ल्याख्य् दुगु थःगु समर्थकतय् दथुइ अर्जेन्टिनां दक्षिण कोरियायात पूवंक कासाय् दबावय् तःगु खः । दक्षिण कोरियाया अग्रपंक्तिया कासामितय्सं छुं बालांगु प्रहार याःगु खःसां उगु प्रहार गोल पोष्टया जाली दुने धाःसा दुहांवने मफुत ।

अथेहे ग्रुप 'बी' अन्तर्गत बिहीवाः जूगु मेगू कासाय् ग्रीसं नाइजेरियायात २-१ गोलं बुकूगु दु । झिम्ह जक दुगु नाइजेरियन टिमया फाइदा कासें ग्रीसं थःगु न्हापांगु कासा त्याकेत ताः लाःगु खः । कालु उचें १६औं मिनेटय् क्येकूगु फ्री किक मार्फत गोल यानाः नाइजेरियां कासाय् अर्गता काःगु खः ।

फ्री स्टेट रंगशालाय् जूगु कासाया ३३औं मिनेटय् नाइजेरियन मध्यपंक्तिया कासामि सानि काइतिं ग्रीसया कासामि तोरोसीदिसयात फल यायेवं रेफरीं काइतियात रेड कार्ड ब्यूगु खः । झिम्ह जक कासामि दुगु नाइजेरियन टिमया फाइदा कासें ग्रीसं न्हापांगु गोल ४४औं मिनेटय् याःगु खः ।

डिमित्रि सालपिङगिडिसया गोलं बराबरी याःगु ग्रीसं निगूगु हाफया ७१औं मिनेटय् भाससिलिस तोरोसिडिसया गोलं कासायात थःगु पक्षय् काःगु खः ।

More Stories Like this