नेदरल्याण्ड पाखें डेनमार्कयात निगू गोल / होण्डाया गोलं जापान त्यात

ग्रुप 'इ' अर्न्तगत सोमवाः जूगु कासाय् फ्यानतय्सं बिचाः याथें बांलागु प्रदर्शन यायेमफुसां नेदरल्याण्डं डेनमार्कयात २-० गोलं बुकूगु दु । डेनमार्कया दबावय् लानाच्वंगु नेदरल्याण्डयात ४६औं मिनेटय् आत्माघाती गोल मार्फत छुं राहत चूलागु खः ।

निगूगु हाफ शुरु जुइवं डेनमार्कया डिफेन्डर सिमोन पोउलसेनं याःगु आत्मघाती गोल व ८५औं मिनेटय् नेदरल्याण्डया स्ट्राइकर डिक्र क्युर्टया गोलया ग्वाहालिं नेदरल्याण्डं डेनमार्कयात २-० गोलं बुकूगु खः । विश्वकपया छगू प्रवल दावेदार कथं दुगु नेदरल्याण्डया स्ट्राइकरतय्सं डेनमार्कया कडा डिफेन्डरतय् समाना यायेमाःगु खः ।

अथेहे ग्रुप 'इ'या मेगू कासाय् एसियाली राष्ट्र जापनं क्यामरुनयात १-० गोलं पराजित याःगु दु । न्हापांगु हाफय् जापानी केइसुके होण्डां याःगु छगू जक गोलया ग्वाहालिं जापानं क्यामरुन विरुद्ध थःगु जित दर्ता याःगु खः ।

विदेशी भूमीइ जूगु विश्वकपय् न्हापांगु जित हासिल या:गु जापनया निंतिं ३९औं मिनेटय् डाइसुके मातसुइया पास क्यामरुनया डिफेन्डरतय्सं क्लियर यायेमफेवं उकीया सदुपयोग यासें होण्डां गोलय् हिलाब्यूगु खः ।

कासाय् स्यामियुल इटो लगायत क्यामरुनया अग्रपंत्तिया कमजोर प्रहारयात पनेत जापानया गोलकिपरयात उली थाकूगु मजूल । बलयात बालंक नियन्त्रणय् तयेमफूगु मू कारणं हे क्यामरुणया कासामितय्सं गोल यायेगु ह्वताःयात सितिकं छ्वयेमाल ।

More Stories Like this