आः स्थानीय जनतां हे ल्हाः तयेमाःगु खः कि?

आः ला जनता दिक्क हे चायेधुंकल, फोहोरया राजनीति खनाः। येँदेय्या फोहोर हानं छक्वः मुना यंकेगु बन्द जूगु दु। निन्हु फोहोर मुनेगु बन्द जूबलय् येँदेय् हानं छक्वः फोहोरया द्वँय् तनीगु स्थिति सिर्जना जूगु दु। दुवाः दुवातय् फोहोरया राश खायेधुंकूगु दुसा लँजुवाःत न्हाय् प्वाः तिनाः जुइमाःगु अवस्था वःगु दु। थौंकन्हय् ला बर्खाया मौसम। छक्वलं वाइ वइ, छक्वलं कडा निभाः त्वइ। थ्व अवस्थाय् उगु फोहोरं गज्याःगु महामारी ब्वलंकीगु खः, उकिया बारे शायद उल्लेख यानाच्वनेम्वाः जुइमाः। येँदेय्या फोहोर वाइगु डम्पिंग साइट वनेगु लँय् च्वंपिं स्थानीय मनूतय्सं पुलांगु माग पूरा मयाः धासें फोहोर वाकेगु बन्द याःगु कारणं थ्व समस्या वःगु जुयाच्वन। उमिगु माग पूरा याइगु निकाय येँ महानगरपालिका खः। स्थानीय जनतां लँ पनाः फोहोर वाकेगु हे बन्द मयाःतले मनपां उमिगु माग बारे गबलें ध्यान बी मखु। अले स्थानीय जनतां नं मनपाया ध्यान सालेगु लागिं फोहोर हे बन्द याना बीगु बाहेक मेगु विकल्प धइगु हे मखं। थ्व निखलःसियां थज्याःगु गलत प्रवृत्तिया शिकार जुयाच्वंगु येँदेय्या स्थानीय जनता। थौंकन्हय् येँ मनपा कर्मचारीया ल्हातय् लानाच्वंगु दु। अनया अप्वः कर्मचारीत पिनेयापिं खः, स्थानीय जनताया समस्या उमिसं मथू। अथे जूगुलिं आः थ्व फोहोरया मामिलाय् धाथें जुयाच्वंगु छु खः, उकी येँदेय्या स्थानीय जनतां हे रुची तयेमाःगु आवश्यकता न्ह्यःने वःगु दु। थ्व ज्याय् माल धाःसा मनपाय् हस्तक्षेप नं याये मालीगु अवस्था वयेफु। आः स्थानीय जनता हे जागरुक जुयाः दना मवयेकं येँदेय्या फोहोरं दीर्घ समाधान लुइकीगु सम्भावना खने मदु ।

More Stories Like this