स्लोभेनिया व घाना निगूलिं देय् १ गोलं विजयी

आइतवाः जूगु न्हापांगु कासाय् स्लोभेनियां अल्जेरियात १-० गोलं बुकूगु दु । अल्जेरिया नापया कासा त्याका: थुगुसीया विश्वकपया दकलय् चीधंगु राष्ट्र स्लोभेनिया ग्रुप 'सी'या न्हापांगु थाय् कायेत सफल जूगु दु ।

इंग्ल्यान्ड व अमेरिका दथुइया कासाय् थें थुगु कासाय् नं गोलकिपरया गल्तिया फाइदा स्लोभेनियात चूलात । ७९औं मिनेटय् स्लोभेनिया कप्टान रोबर्ट कोरेनं क्येकूगु बलयात अल्जेरियाया गोलकिपर फाउजी छाउचीं ज्वनेत बांलागु निर्णय यायेमफेवं उगु प्रहार गोलय् हिउगु खः ।

अल्जेरियाया अबडेल्कादर घेजालयात पेनाल्टि एरिया दुने ह्याण्डबल याःगुलिं रेडकार्ड बीवं स्लोभेनिया झिम्ह जक कासामि दुगु टिमयात अल्जेरियां बूकाः विश्वकप धेंधेंबल्लाय् थःगु न्हापांगु विजयी हासिल याःगु खः ।

मेगू कासाय् असामोह ज्ञानया पेनाल्टि मार्फत घानां सर्बियायात १-० गोलं बुकूगु दु । ग्रुप 'डी' अर्न्तगतया कासाय् पेनाल्टि एरिया दुने सर्बियाया कुजमानोभिकया ह्याण्डबलयात रेफरिं पेनाल्टि बीवं उकीया सहि सदुपयोग यासें ज्ञानं ८४औं मिनेटय् गोल याःगु खः ।

थुगु कासाय् नं सर्बिया कासामि अलेकजेण्डर लुकोभिकयात निगूगु म्हासुकार्ड लिपा पिने छ्वयेवं घानां झिम्ह जक कासामिया सामना यासें फाइदा काःगु खः ।

More Stories Like this