दक्षिण कोरिया व अर्जेन्टिना विजयी

इंग्ल्यान्ड व अमेरिका १-१या बराबरीइ

शनिवाः जूगु ग्रुप बी अर्न्तगतया कासाय् दक्षिण कोरिया व अर्जेन्टिना विजयी जूगु दु । ग्रुप बीया न्हापांगु कासाय् दक्षिण कोरियां ग्रीसयात २-०या गोल अन्तरं बुकूगु खःसा मेगू कासाय् अर्जेन्टिनां नाइजेरियायात १-० गोलं बुकूगु खः ।

पोर्ट एलिजाबेथया नेल्शन मण्डेला बे रंगाशालाय् जूगु न्हापांगु कासाय् कोरियन कासामीत लि जुङसु व पार्क जिसुङं ग्रीस विरुद्ध निगू गोल यानाः विश्वकप धेंधेंबल्लाय् कोरियायात सशक्त रुपं न्ह्यब्वःगु दु । ६औं मिनेटय् कि सुङयोङं क्येकूगु फ्री किकयात लिं गोलय् हिलाब्यूगु खः ।

कासा शुरु जूगु छुं मिनेट तक बालांगु प्रदर्शन यायेमफूगु कोरियन कासामितय् निंतिं निगुगू गोल म्यानचेस्ट युनाइटेडया मिडफिल्डर पार्कं ५६औं मिनेटय् याःगु खः ।

अथेहे ग्रुप बीया मेगू कासाय् विश्वकपया प्रवल दावेदार अर्जेन्टिनां नाइजेरियायात १-० गोलं बुकल । नाइजेरिया कमजोर डिफेन्सया फाइडा कया अर्जेन्टिनाया जर्सी नम्बर ६या कासामी ग्याब्रियन हेन्जं ६औं मिनेटय् गोल याःगु खः ।

शारिरक रुपय् तकडा जुसां नाइजेरियन कासामितय्सं अर्जेन्टिनया नांजाम्ह कासामि लियोनल मेसिया सान्दार प्रदर्शन नापं अग्रपंक्तियात पनेत तसकं थाकूगु खः । तर मेसि नापं गोन्जालो हिगुआनयात गोल यायेगु बांलागु यक्व ह्वताः दुगु खःसां उकीयात उमिसं सदुपयोग यायेमफुत ।

उखे नाइजेरिया ताये थाइवं कासायात बराबरीलय् ह्येगु निंतिं याःगु प्रहार पोष्टया छुं इन्चं जक पिहांवंगु ख:सा कालु उछें छगू बालांगु क्रसयात सितिकं छ्वःगु खः ।

अथेहे ग्रुप सी अर्न्तगत जूगु न्हापांगु कासाय् इंग्ल्यान्ड व अमेरिका १-१ गोलया बारबरीइ सन्तुष्ट जुइत बाध्य जूगु दु । इंग्ल्यान्डया गोलकिपर रोबर्ट ग्रीनया सामान्य गल्तीं अमेरिकायात १-१या बराबरी यायेगु ह्वताः चूलागु खः ।

छगू गोलं ल्यूने लानाच्वंगु अमेरिकाया निंतिं ४०औं मिनेटय् क्लिन्ट डिम्पसीं पेनाल्टि एरिया पिने नं प्रहार याःगु बलयात इंग्ल्यान्डया गोलकिपर ग्रीनं बालांक ज्वनेमफूगु खः । थ्वस्वयां न्ह्यः ४औं मिनेटय् इंग्ल्यान्डया कप्टान स्टफेन जेराडं गोल याःगु खः ।

More Stories Like this