न्हापांगु निगूलिं कासा बराबरीइ

दक्षिण अफ्रिकी साबाला पाखें न्हापांगु गोल

दक्षिण अफ्रिकाय् शुरु जूगु सनय् २०१०या विश्वकप धेंधेबल्लाय् आयोजक देय् दक्षिण अफ्रिका व मेक्सिको दथुइया जूगु न्हापांगु कासा १-१ गोलय बाराबरीइ क्वचाःगु दु ।

जोहानेसबर्गया सकर सिटी रंगशालाय् घेरालु दर्शकतय् न्ह्यने दक्षिण अफ्रिकाया साबालां ५५औं मिनेटय् न्हापांगु गोल याःगु खः । निगुगू हाफया झिगू मिनेट लिपा देपा पाखें वःगु पासया बांलागु सदुपयोग यासें साबालां गोल याःगु खः । थ्व गोल नापां साबाला सन् २०१०या विश्वकपय् न्हापांम्ह गोली याम्ह कासामिया कथं थःगु नां च्वकेत ताः लाःगु दु ।

अधिकांश ई मेक्सिकोया दबावय् लाःगु आयोजक देय्यात न्हापांगु गोलं छुं राहत ब्यूगु खःसां ७९औं मिनेटय् देपा पाखें ब्यूगु आर्न्डेस ग्वाराडाडोया पासायात मार्क्वेजं गोलय् परिणत याःगु खः । कासाय् निगूलिं देय्या कासामितय्सं यक्वय् बांलागु पासयात बांलाक क्षलय् मफेवं १-१ गोलया बारबारीलय् सन्तुष्ट जुइमाःगु खः ।

अथेहे शुक्रवाः चान्हय् फ्रान्स व उरुग्वे दथुइ जूगु निगुगू कासा ०-०या बराबरीलय् क्वचाःगु दु । केपटाउनया ग्रीन प्वाइन्ट रंगशालाय् जूगु कासाय् अधिकांश इलय् फ्रान्सं उरुग्वेयात दवाबय् तःगु खःसां गोल धाःसा यायेमफुत ।

उगु कासाय् उरुग्वेया निकोलस लोडेरियायात थुगु विश्वकपया न्हापांगु रेडकार्ड ब्यूगु खः । कासाया ८१औं मिनेटय् याःगु निक्वःगु फल बापट रेडकार्ड ब्यूगु खः । थ्वस्वयां न्ह्यः १७औं मिनेटय् नं लोडेरिं याःगु फलया निंतिं म्हासूगुकार्ड ब्यूगु खः ।

More Stories Like this