१९ क्वःगु विश्वकप शुरु

अफ्रिकी महादेशया नांजाःगु देय् दक्षिण अफ्रिकाय् विश्वकप फुटबल धेंधेंबल्ला शुरु जूगु दु । दक्षिण अफ्रिकाया जोहानेसबर्ग शहरया सकर सिटी रंगशालाय् जूगु छगू भव्य ज्याझ्वःया दथुइ १९ क्वःगु संस्करणया विश्वकप धेंधेंबल्ला शुरु जूगु खः ।

उल्लेज्या ज्याझ्वलय् १,५०० स्वयां अप्व कलाकारतय्सं थीथी सांगीतक व अफ्रिकन शैलीया झाँकी सहितया ज्याझ्वः न्ह्यब्वःगु खः । अफ्रिकन संगीतय् नोबेल शान्ति विजेता डेस्मण्ड टुटु नं १,५०० म्ह कलाकारत व हजारौं दर्शकतय् न्ह्यने प्याखँ ल्हुयादीगु खः ।

थुगुसीया धेधेंबल्लाय् दुथ्याःगु अफ्रिकाया खुगू देय्त दक्षिण अफ्रिका, नाइजेरिया, घाना, क्यामरुण, आइभोरी कोस्ट व अल्जेरियाया म्ये नं ज्याझ्वलय् हाःगु खःसा ग्राय्मी अवार्ड विजेता आर केलीं नं उल्लेज्या ज्याझ्वलय् म्ये हाःगु खः ।

ज्याझ्वलय् दक्षिण अफ्रिकाया पुलांम्ह राष्ट्रपति नेल्शन मण्डेलाया अनुपस्थिति धाःसा दक्विसंया निंतिं छगू म्हापूगु विषय जुल । मण्डेला थः छुइ मदुगुलिं ज्याझ्वलय् ब्वति कयामदीगु खः । वय्कया छुइ बिहीवाः चान्हय् कार दुर्घटनाय् मदुगु खः ।

More Stories Like this