माओवादीइ नं कचवं
बाबुरामयात पनेत प्रचण्ड हे प्रम जुइमाःगु निर्णय?
येँ (सन्ध्या टाइम्स)/आः हानं दयेकीगु न्हूगु राष्ट्रिय सरकारया नेतृत्व माओवादी अध्यक्ष प्रचण्डं हे यायेमाः धकाः माओवादीपाखें निर्णय यायेवं थुकिं देय्या राजनीतिइ हानं गतिरोध पिकाःगु ला द हे दु, उकिया नापनापं स्वयम् माओवादी दुने नं सी मदयेक कचवं ब्वलंकीगु संकेत खने दया वःगु दु ।
सूत्रतय्सं बिउगु जानकारी कथं पार्टीपाखें अध्यक्ष प्रचण्डं हे सरकारया नेतृत्व यायेमाः धकाः निर्णय याःगुया कारण डा. बाबुराम भट्टराईयात पाः मबीत खः। एमाले व कांग्रेसं प्रचण्डयात ला स्वीकार याये मखु धाये हे धुंकूगु दु। उकिं मेम्ह विकल्प माले माली धइगु खँ पिहां वयाच्वंगु खः। तर माओवादी दुने प्रचण्ड पक्षधर छगू पुचः धाःसा बाबुरामयात गुगुं हालतय् नं प्रधानमन्त्री दयेके मजिउ बरु मेगु हे पार्टीयात अवसर बिउसां जिउ धइगु पक्षय् दु। उखे बाबुराम पक्षं सरकारया नेतृत्व माओवादीं हे यायेमाः धासें सरकारया नेतृत्व यायेगु अवसर न्ह्यःने वयाच्वंगु दयेक दयेकं छाय् कर्पिंत त्वःतेगु धकाः तर्क तयाच्वंगु दु। अय् जुयाः प्रचण्ड पक्षं यदि सरकारया नेतृत्व माओवादीं यायेगु खःसा व याइम्ह नेता प्रचण्ड हे जुइमाः धकाः हानं मेगु तर्क न्ह्यःन तये हःगु खः ।
माओवादीपाखें प्रधानमन्त्री प्रचण्डयात हे दयेकेमाः धकाः निर्णंय याःगुलिं तयार जुइ थे च्वंगु सरकारया खाका हानं विवादय् लाःगु दु ।
मेपिं वये न्ह्यः हे सूद वालुवाटारय्
न्हूगु राष्ट्रिय सरकार गठनया बारे एमाले व कांग्रेसं तयार याःगु खाका बारे सहलह यायेत थौं निगू पार्टी दथुइ खँल्हाबल्हा जुइ न्ह्यः प्रधानमन्त्री माधव नेपालं भारतीय राजदूत राकेश सूदलिसे निं सल्लाह ब्याकादीगु दु। राजदूत सूद थौं सुथय् हे वालुवाटार वनाः प्रधानमन्त्री नेपाललिसे वय्कलं तयार यानादीगु खाका बारे सल्लाह ब्याकादीगु खः। वय्कःपिनि दथुइ मेघालयय् नेपाःमितय्त जुयाच्वंगु आक्रमण बारे नं खँल्हाबल्हा जूगु खः। प्रमलिसे खँ ल्हानाः सूद लिहां वनेधुंकाः तिनि वालुवाटारय् एमाले व कांग्रेसया नेतातय् बैठक शुरु जूगु खः ।
