विश्वय् शान्ति हयेमा विश्वकपं

विश्वया दकलय् लोकंह्वाःगु व दकलय् अप्वः मनूतय्सं म्हितीगु कासा फुटबलया महाकुम्भ थनिंनिसें अफ्रिकी मुलुक दक्षिण अफ्रिकाय् शुरु जुयाच्वंगु दु। थौं कासा शुरु जुइवं आः वइगु लछि तक थुकिं सम्पूर्ण विश्वयात थःगु जःखः केन्द्रित याइगु निश्चित दु। थ्व लछि फुटबलया देय्त हे महाशक्ति जुइ अले फुटबलया महान कासामित हे महाशक्तिया शक्तिवान नेता जुइ। लछि तक मुक्कं विश्वयात हे छगू केन्द्रय् छधी याना तये फइगु फुटबलया थ्व आकर्षण शक्ति धाथें नं अदुभूत खः ।

फुटबल विश्वया हे दकलय् यक्व मनूतय्सं स्वइगु कासाया रुपय् नां जाः। थौंया विश्वय् फुटबल छगू कासाय् जक नं सीमित मजुइधुंकल। व्यावसायिकतां फुटबलयात छगू तःधंगु व्यवसाय व लखौं मनूत संलग्न जुयाच्वंगु छगू विशिष्ट उद्योगया हे रुप बीधुंकल धाःसां जिउ। यद्यपि फुटबलया 'औद्योगीकरण' झी नेपाःया लागिं कल्पनां पिनेया खँ खः। अथे खःसां फुटबलया क्रेज नेपालय् नं सुं तःधंगु महाशक्ति देशय् स्वयां म्हो धाःसा मजू। उकिं थ्व लछि नेपाः नं विश्वकपमय जुइगु खँय् शंका मदु ।

फुटबल जक मखु कासा धइगु हे निगू पुचः, निगू देय् दथुइ मित्रता व भ्रातृत्वया स्वापू दयेकीगु माध्यम खः। विश्वकप फुटबल विश्वया फुक्क हे देय्लिसे स्वापू दुगु कासा जूगुलिं थ्व नं विश्वय् मित्रता, भ्रातृत्व व शान्ति कायम यायेगु दिशापाखेया छगू ज्वः मदुगु पलाः जुइफु धइगु खँय् शायद शंका यायेम्वाः। फुटबलया माध्यमं विश्वय् खने दयाच्वंगु तनाव, आतंक, द्वेष, आक्रोशयात क्वपालाः छगू सुन्दर विश्व दयेकेगुपाखे मैत्रीपूर्ण पलाः न्ह्याके फइ धकाः झीसं आशा याये ।

More Stories Like this