माओवादीया अस्तित्वय् न्ह्यसः

तारण शाक्य

नेतागिरितन्त्रय् न्ह्यइपुकाच्वंपिं माधव कुमार थेंज्याःम्ह जनतां वांछ्वया तःम्हेसित प्रधानमन्त्री दयेकाः कांग्रेस-एमालेया नेतात लय्ताइगु स्वाभाविक जुल। तर थ्व सरकार जनताया दृष्टिं नैतिकहीन, चरित्रहीन व जनमतं मखु बहुमतं थनातःम्ह बुँख्याःचा सिबाय् देय् व जनता प्रति बफादार मखु धइगु खँ व्यवहारं हे साबित जुल। यदि अथे मखु धकाः साबित यायेगु खःसा अरबौं तका खर्च यानाः संविधानसभाया चुनाव छाय् याये माल? संविधानसभां अयोग्य ठहरे याना तःपिनिगु सरकार छाय् दयेके माल? संविधान दयेकेगु लागिं जनतां ल्यया हःपिं कांग्रेस, एमाले लगायत पार्टीया नेतात फुक्कं नालायक जुल ला?

प्रधानमन्त्री माधव नेपालं थ्व सरकार संविधान निर्माणया लागिं मखु धकाः घोषणा यायेधुंकूगु अवस्थाय् वय्कःयात प्रधानमन्त्री याःपिं पार्टी व नेतातय्गु नैतिकता संकटय् मलाः ला? थज्याःम्ह मनूयात सरकारय् तयां दच्छिया दुने न्हूगु संविधान निर्माण जुइ ला? अन्तरिम संविधानया आधारय् दयेकूगु थ्व सरकारया ब्यवहार संकट मुक्त जुइ मफुत। स्वंगू प्रमुख दलया सहमति व सहकार्य धयागु जनतायात झंगः लायेगु व देय् व जनता प्रति राजनीतिक दृष्टिं बेइमानी यायेगु जक जुल ।

संघीय लोकतान्त्रिक गणतन्त्रया संविधान दयेकेगु जनादेश खः। थज्याःगु राष्ट्रिय विषययात म्हितेगु न्ह्यवःसा यानाः स्वंगू दलया नेतातय्सं नेतातय्गु हे अवमूल्यन याना क्यंगु दु। ध्रुवीकृत राजनीतिइ हैकमवादी प्रवृत्ति लादे यानाः छगू दलं मेगु दलयात खिचा थें व्यवहार यायेगु ई आः मखुत। संविधानसभाया म्याद दछि तनाः राजनीति स्यंकेगु कुतः अति हे भयंकर खः। नेतातय्गु अज्याःगु कुदृष्टिं देय् व जनता हाकनं छक्वः हिंसात्मक संकटं न्ह्यज्याये मालीगु अवस्था खनेदत। माओवादीं थःपिनि अस्तित्व ल्यंका तयेत कुतः याये मालाच्वंगु दुसा कांग्रेस-एमालें नं थःपिनि अस्तित्व संकटय् लानाच्वंगु ल्वःमंके मजिल। यथास्थितिवादी सोचया धरातलय् हे संकटय् लानाच्वंगु दु। २१ औं शताब्दीइ नेतातय्गु न्ह्यपुइ नं राजनीतिक चेतनाय् हिउपाः वयेके माल।
अथे जूगुलिं संविधान निर्माणया जनादेशया अक्षरस पालना याइगु इलय् संविधान पित बीगु दक्षता व क्षमता न्ह्यब्वयाः नेतातय्सं थःपिनि नैतिक चरित्र न्ह्यब्वयाः क्यने माल। थ्व ज्यायात कासा यानाः म्हितल धाःसा नेतातय्गु अस्तित्व माः जुइमाली ।

देय्या राजनीतिक धरातलय् माओवादीया तिलस्मी ढंगं प्रवेश धयागु हे कांग्रेसतय्गु अस्तित्वय् न्ह्यसः जूवन। छझाः थारा न्हुयाः विपक्षय् च्वनाः माओवादीतय्त अध्ययन नं याःगु हे खः। कांग्रेस राजनीति माओवादीयात गुगु स्थितिइ तयातःगु खः। वहे स्थितिइ माओवादीतय्त नं तया तयेगु क्षमता क्यनेगु कांग्रेसया प्रयत्न धयागु थौंकन्हय्या राजनीतिया गथः जुयाच्वन। गिरिजाया 'ग्रायण्ड डिजाइनं' देय्या राजनीतियात प्रभावित याः थें माओवादीया 'न्हूगु नेपाः' प्रस्तावं कांग्रेसयात थारा न्हुइका बिल। अथे जूगुलिं एमालेया अयोग्य नेतायात प्रधानमन्त्री दयेकाः माओवादीत नापं ल्वायेगु ल्वाभः तयार यात। थौं वहे ल्वाभःया प्रभावं माओवादीतय्गु अस्तित्व संकटय् लानाच्वन। जंगली किसी रुपी माओवादीतय्त कजे यानाः थःगु बसय् तयेगु लागिं याइगु हठकण्डी नाला स्यंकेत स्वये थें कम्युनिष्ट माओवादीतय्त कम्युनिष्ट एमालेयात ल्वाभः दयेकाः छ्यलाः तमासा स्वयाच्वन। तर थ्व ई संविधान निर्माणया ई जूगुलिं अथे राजनीतिक कासा म्हितेगु ई मखु। अथे जूगुलिं कांग्रेसं ईयात म्हसीकाः छ्यले सयेके माल। अन्यथा उकिया नतिजा बांलाइ मखु धकाः नं सीके माल ।

संविधानसभाया चुनावं माओवादीयात बहुमत वयेवं माओवादीत गम्के जुल तर कांग्रेस एमाले झस्के जुल। थ्वहे झस्काईया रणनीतिं यानाः माओवादीं प्रधानमन्त्री पदं राजीनामा बीमाल। अबलय्निसें भाइचाराया गथः नं छ्वासुया वन। प्रधानसेनापति व राष्ट्रपति प्रकरणंनिसें लांलां सतक अवरुद्ध यानाः जनताया ब्वः फफं बजेट पास यायेत जक संसद चायेकाः सरकारयात ग्वाहालि यायेगु प्रक्रियां माओवादीं जनतां तालि थाःगु नं स्वये माल। थथे संसदय् जोकर फाल्तु यानातःगु वाःचायेवं सतक आन्दोलन कुहां वल। स्वकः तक गाईजात्रे रणनीतिक आन्दोलनं यानाः लाखौं जनता सतकय् हयाः नं थ्व अनैतिक सरकारयात थी मफयेवं चिचीधंगु पार्टीतय्गु तुति मालाः प्रशंसा याः जुल। उकिया लिच्वः नं हात लागे शुन्य जुइवं 'लुयावःगु विदेशी कठपुतली सरकार' जुसेलि भतिचा झासु लंकाः कांग्रेस-एमाले विदेशी शक्तिया भक्त धकाः थुइकेत बाध्य जुल। अथे नं थथे थीथी काण्डय् माओवादीतय्सं थःपिंत गथे थुइकल धाये मफु ।

देय्या विकसित राजनीतिइ नेतातय्गु चरित्रहीन प्रवृत्ति सीकाः नं लांलां समझदारी व सहकार्य यायेगु धाधां संविधानसभाया निदँ म्याद फुकेगु कांग्रेस-एमालेया चाल हे खः धाःसां संसदय् बहुमत कया वा धकाः प्रधानमन्त्री व मन्त्रीतय्सं माओवादीतय्त बिउगु हाथ्या धइगु कांग्रेस-एमालें माओवादीयात पँसे यायेत वांछ्वःगु जाल हे जुयाच्वन। आः माओवादीतय्सं थःपिं सु धकाः हे म्हमसीधुंकल। नागरिक पार्टी धायेगु ला? हैकमवादी पार्टी धायेगु? नागरिक पार्टी धाये धाःसा सरकारयाके थें सेना दुगु पार्टीयात गथे नागरिक पार्टी धायेगु? हैकमवादी पार्टी धाये ला धाःसा जनतां हे ल्यया हःगु पार्टीयात गथे हैकमवादी पार्टी धाये फइ? हाकनं उलिमछि सहमति व सहकार्य ल्हाःचिं ततं पारित जुल हँ, जनतां छुं मसिउ। जनतां सिउगु ला माओवादी नेतातय्सं जनतां हाः जू थें मौखिक सहमति जूगु प्रधानमन्त्रीं न्यान्हुया दुने राजीनामा बीगु धाःगु जक खः। प्रमाण धाःसा मौखिक सहमति जक। गन तक विश्वास यायेगु? लिखित सहमति हे कार्यान्वयन मजू धाःसा मौखिक सहमतिया छु कदर जुइ? व नं देय्या भ्रष्ट प्रधानमन्त्रीं प्रचण्डं थें अःपुक राजीनामा बी धकाः कल्पना याइपिंत 'ध्वं' धायेगु सिबाय् प्रशंसा यायेथाय् मदु ।

More Stories Like this