विश्वकप उल्लेज्याय् मण्डेलां ब्वति मकाइगु

नोबेल शान्ति सिरपा विजेता नापं दक्षिण अफ्रिकाया पुलांम्ह राष्ट्रपति नेल्शन मण्डेलां शुक्रवा बहनी जुइगु विश्वकप उल्लेज्या ज्याझ्वलय् ब्वति मकाइगु जूगु दु ।

नेल्सन मण्डेला फाउण्डेशनं शुक्रवाः पिथंगु विज्ञप्तिया कथं बिहीवाः चान्हय् जूगु विश्वकप कन्सर्ट लिपा छेँ लिहांवनाच्वंम्ह मण्डेलाया छुइ जेनानी मण्डेला कार दुर्घटनाय् मदुगुलिं वय्कलं उल्लेज्या ज्याझ्वलय् ब्वति मकाइगु जूगु खः ।

बिहीवाः चान्हय् ड्राइभरं अय्ला त्वनाः कार चलेयाःगु इलय् झिंस्वदँया जेनानी मदुगु खः । जेनानी मदुगुलिं मण्डेलाया छेँजः शोकय् दुगुलिं थौं बहनी दक्षिण अफ्रिकाया जोहानसबर्गय् जुइगु उल्लेज्या ज्याझ्वलय् वय्कलं ब्वति कयामदीगु जूगु खः ।

थंज्याःगु शोकया इलय् दक्षिण अफ्रिकी जनता व हलिमय्न्यंकया मनूत मण्डेला व वय्कया छेँजःया नापं छप्पँ जुया च्वनीगु विश्वास फाउण्डेशनया विज्ञप्तिइ प्वंकातःगु दु ।

More Stories Like this