थनिंनिसें फुटबलया महाउत्सव

प्यदँय् छक्व वइगु फुटबलया महाउत्सव विश्वकप फुटवल थनिंनिसें शुरु जुइत्यंगु दु । अफ्रिका महादेशय् न्हापांगु खुसीइ जुइत्यंगु विश्वकपया आयोजना थुगुसी दक्षिण अफ्रिकां याःगु दु । विश्वकपया न्हापांगु कासा आयोजक देय् दक्षिण अफ्रिका व मेक्सिको दथुइ जोहानसबर्गया सकर सिटी रंगशालाय् नेपाः ई कथं १९:४५य् शुरु जुइ ।

सनय् २००४य् मोरक्को व इजिप्टयात ल्यूने लाकाः दक्षिण अफ्रिकां थुगुसीया विश्वकप धेंधेंबल्ला ग्वसाःग्वय्गु ह्वताः चूकाकूगु खः । सन् २००४ निसें दक्षिण अफ्रिकां ३ अर्ब ५५ करोड अमेरिकी डलर फुकाः रंगशाला, एयरपोर्ट लगायत भौतिक पूर्वाधारत तयार याःगु दु । लच्छि तक न्ह्याइगु विश्वकप धेंधेंबल्ला दक्षिण अफ्रिकाया गुगू शहरया झिगू रंगशालाय् जुइ ।

हलिमय्न्यंकया ३२ देय्त दुथ्याःगु थुगुसीया १९ क्वःगु संसकरणया विश्वकपया न्हापांगु कासा जुइ न्ह्यः पीगु मिनेट तक उल्लेज्या ज्याझ्वः याइगु ग्वसाः दु । उगु ज्याझ्वलय् कोलम्बियन पपस्टार सकिरा सहित १५८१ जवान कलाकारतय्सं थःगु प्रस्तुति न्ह्यब्वइ ।

आः तक विश्वकप न्याक्वः तक त्याकेधुंकूगु दक्षिण अमेरिकी महादेशीय राष्ट्र ब्राजिल थुगुसी नं विश्वकप उपाधिया निंतिं प्रवल दाबेदार कथं दुसाः ब्राजिल नापं डिफेन्डिङ च्याम्पियन इटाली, स्पने, इंग्लायन्ड व अर्जेन्टिना नं उपाधिया कडा दाबेदार कथं कयातःगु दु ।

More Stories Like this