एअरबस मन्यासे ईयुयात तं

राजीनामा हजि धाःगुलिं एअरबस मन्यायेगु निर्णय

येँ (सन्ध्या टाइम्स)/युरोपियन युनियनं थःत राजीनामा बिउ धकाः दवाव बिउगुया तं प्रधानमन्त्री माधव नेपालं नेपाल वायुसेवा निगमया जहाज न्यायेगु ज्याय् वनाः प्वंकादीगु दु। माओवादीं उकुन्हु अनिश्चितकालीन आमहडताल यानाच्वंगु इलय् युरोपियन युनियनया राजदूततय्सं प्रधानमन्त्री नेपालयात नापलानाः ४८ घण्टाया दुने राजीनामा बिउ धकाः दवाव बिउगु खः। प्रम नेपालं उमिगु दवावयात अस्वीकार याःगु ला ख हे खत, उकिया नापनापं आः वयाः उकिया हे तं प्वंके कथं नेपाल वायुसेवा निगमं छगः एअरबस न्यायेगु लागिं यानाच्वंगु तयारी लित का धकाः निर्देशन बिउगु दु। एअरबस धइगु युरोपया थीथी देय्त जानाः दयेकीगु विमान खः। विश्वन्यंकं युरोपया एअरबस व अमेरिकाया बोइङ्ग दथुइ तःधंगु धेंधेंबल्लाः जुयाच्वंगु दु। नेपाल वायुसेवा निगमं एअरबस न्यायेगु धकाः वंगु न्याला न्ह्यः हे निर्णय यानातःगु खः उकिया लागिं ५ करोड तका 'लकअप मनी' नं छ्वयेधुंकूगु दु। थ्व लकअप मनी धइगु लिहां मवइगु बैना खः। थौं न्याला लिपा वयाः
सरकारं एअरबस न्याये मते धकाः निर्णय याःगु जक मखु, अज्याःगु लकअप मनी लित का धकाः समेत निर्देशन बिउगु दु। न्याला लिपा वयाः सरकारं एअरबस न्यायेगु मखु धकाः निर्णय याःगु धइगु नेपाःस्थित युरोपियन युनियनया राजदूततय्त घुर्की क्यंगु खः धकाः सूत्रं धाःगु दु ।

सूत्रतय्सं धाः कथं एअरबस कम्पनीं हालसालय् वयाः थःपिनि विमानया भाः करिब ५० करोड तका थकाःगु दु। तर नेपालं लकअप मनी बिया तयेधुंकूगु नेपाःयात पुलांगु हे भावं विमान बीगु खँ धाःगु दु। छुं जुयाः नेपालं लकअप मनी रद्द यानाः हानं न्हूगु प्रक्रियां विमान न्यायेगु कुतः यात धाःसा थ्व ५० करोड तका अप्वः पुले मालीगु खँ नं सूत्रं धाःगु दु ।

नेपाल वायुसेवा निगमं आः न्यायेत्यंगु न्यारो बडी एअरबस छगःया मू स्वंगूत्या अर्ब तका तू। सरकारं नेपाल भ्रमण वर्ष न्यायेकेगु धकाः घोषणा यानातःगु इलय् विमान न्यायेमते धकाः अर्थ मन्त्रालयं पौ छ्वया हःगु खँयात वायुसेवा निगमलिसे सम्बन्धित पर्यटन मन्त्रालयं हे कडा रुपं विरोध याःगु दु ।