चित्तधर लुमंके

म्हिगः १०४ दँ बुन्हिया झ्वलय् / थीथी सिरपाः लःल्हात

नेपालभाषा परिषद्पाखें बीगु याना वयाच्वंगु चित्तधर सिरपाः, ठाकुरलाल सिरपाः व भाषाथुवाः मानार्थ उपाधि म्हिगः छगू ज्याझ्वःया दथुइ लःल्हात ।

मानार्थ भाषाथुवाः उपाधिं विभूषित जुयादीम्ह बाखं च्वमि लक्ष्मण राजवंशीं मनूया म्हसीका भाषां बी, जातिया म्हसीका संस्कृतिं बी धासें यदि राजनीतिक हिउपाः लिसें भाषाय् नं हिउपाः वल धाःसा संस्कृति न्हना वनी धयादिल।
ज्याझ्वलय् वय्कःयात नेपालभाषा परिषद्या नायः फणीन्द्ररत्न वज्राचार्यं छ्यनय् बेतालिं चिकाः हनादीगु खः। लिसें वय्कःयात दोसल्लां नं न्ययेकूगु खः।

ज्याझ्वलय् चित्तधर सिरपाः इलोहं प्रकाशनयात लःल्हाःगु खः। सिरपाः लःल्हाना कासें ईलोहंया सम्पादक नरेशवीर शाक्यं थम्हं हे सफू मिउ जुइगु चित्तधर 'ह्दय'या बानीयात जक थःपिंसं अनुशरण यानागु खँ कनादिल। वय्कलं नेवाः भाय्या पत्रपत्रिकायात विज्ञापन बीपिनिगु मानसिकताय् हिउपाः हयेमाःगु बिचाः नं प्वंकादिल। साहित्य विकासया लागिं नेवाः भाय्या सफू न्यानाः ब्वनेगु बानीया विकास यायेमाःगु खँय् नं वय्कलं बः बियादिल ।

अथे हे नेपालभाषाया निबन्धकारतय्त बीगु ठाकुरलाल सिरपाः मिसाम्ह निबन्धकार मय्जु अपर्णा प्रधानयात लःल्हात। सिरपाः लःल्हाना कासें मय्जु प्रधानं थःत साहित्यय् वयेगु लागिं हःपाः बियादीम्ह थः बाज्या रामजी प्रधानयात लुमंकादिल ।

वय्कःपिंत मू पाहां प्रा. माणिकलाल श्रेष्ठं सिरपाः लःल्हानादीगु खः। ज्याझ्वलय् न्ववासें मू पाहां श्रेष्ठं थः नं चित्तधर 'ह्दय' या प्रेरणां नेपालभाषा साहित्य ख्यलय् दुहां वयागु खँ कनादिल। चित्तधर 'ह्दयं' नेपालभाषा एमए तगिमय् समालोचना विषय ब्वंकेगु लागिं अथें हे थःगु नां सिफारिस यानाः थःत थ्व ख्यलय् हःगु नं भाजु श्रेष्ठं कनादिल ।

उगु हे ज्याझ्वलय् चित्तधर 'ह्दय' जन्म जुयादीगु नेपालभाषा परिषद्या छेँ जीर्णोद्धार यायेगु ज्याय् मू भूमिका म्हितादीम्ह परिषद्या दुजः नवीन चित्रकारयात नं विशेष सुभाय् सहित दसिपौ लःल्हाःगु खः। ज्याझ्वलय् परिषद्या छ्यांज्ये अष्टमुनि बज्राचार्यं लसकुस न्वचु बियादीगु खः ।

झ्वाताय् श्रद्धाया स्वां देछा
कविकेशरी चित्तधर 'ह्दय' या १०४ दँ बुन्हिया लसताय् कालिमाटीया चित्तधर चोकय् च्वंगु वय्कःया झ्वाताय् स्वां देछायेगु ज्या जुल। उगु ज्याझ्वलय् नेपालभाषा परिषद्या नायः फणीन्द्ररत्न वज्राचार्य, डा. केशरीलक्ष्मी मानन्धर, चित्तधरया झ्वाता पलिस्था यायेत स्वंगु निर्माण समितिया नायः एवं नांजाःम्ह धावक बैकुण्ठ मानन्धर, अष्टमुनि वज्राचार्य आदि लगायत आपालं साहित्यकारपिनि उपस्थिति दुगु खः ।

झी कवि चित्तधरया सछिदँ बुन्हि हनेगु झ्वलय् कालिमाटीया उगु दुवातय् वय्कःया पूर्ण कदया झ्वाता धस्वाकेगु ज्या जूगु खः। झ्वाता तसांनिसें अन दँय्दसं चित्तधर बुन्हि कुन्हु झ्वाताय् स्वां देछायाः वय्कःयात लुमंकेगु ज्या जुया वयाच्वंगु दु ।

More Stories Like this