ओएचसीएचआरयात सरकारया पंगः

राष्ट्र संघीय मानव अधिकार आयोग ओएचसीएचआर या क्षेत्रीय ज्याकूत बन्द यायेगु निर्णय सहित सरकारं उगु निकायया म्याद नं मेगु दछि जक थपे याना बिउगु दु। थ्व स्वयां न्ह्यः संयुक्त राष्ट्र संघीय मिशन नेपाल अनमिनया म्याद सरकारं प्यला जक थपे यानाः उगु निकाययात नं बिदाबाजी बीगु तयारी शुरु याःगु खः। राष्ट्र संघीय ज्याकूतय्त सरकारं छाय् थज्याःगु व्यवहार याना हल, थ्व थुइके थाकुगु विषय जुयाच्वंगु दु। अथे खःसां पिनें खने दुगु खँ छु ले धायेबलय् नेपाः वयाच्वंगु राष्ट्र संघीय ज्याकूतय्त नेपाः सरकारं थज्याःगु व्यवहार याःगुया लिउने भारतया ल्हाः दु। मखु धइगु खःसा देय्या शान्ति प्रक्रिया थासय् मलानाच्वंगु इलय्, अझ नं युद्ध जुइतिनि ला धइगु ग्याःचिकु ब्वलनाच्वंगु इलय्, माओवादी बाहेक मेमेगु नं सशस्त्र पुचःया उदय जुयाच्वंगु इलय् मानव अधिकारया निगरानी याइगु छगू अन्तर्राष्ट्रिय निकाययात नेपालं पितिना छ्वयेमाःगुया कारण छु दु? धायेत ला आः नेपालय् थःगु हे राष्ट्रिय मानव अधिकार आयोग दयेधुंकूगु कारणं राष्ट्र संघया मानव अधिकार आयोग माःगु मंत नं धायेगु याः। तर नेपाःया राष्ट्रिय आयोग धइगु स्वयम् सरकारं तक हे टेरे मयाइगु आयोग खः। थ्व आयोगं कारवाहीया सिफारिस याःपिं अपराधीत थौं नं याउँक चाःहिला च्वंगु सकस्यां खं। थज्याःगु अवस्थाय् मानव अधिकारया सवालय् राज्ययात अन्तर्राष्ट्रिय दवाव बीकेगु लागिं नं राष्ट्र संघीय निकायया आवश्यकता जुइगु खः। तर अन्तर्राष्ट्रिय निकाययात अज्याःगु ज्या मयाकेत राज्य हे लगे जुयाच्वंगुया लिउने छु कारण दु, थ्व धाःसा जनतां थुइके मफुगु विषय जुयाच्वंगु दु ।

More Stories Like this