महाराजगंजय् बम विष्फोट
संविधानसभाया म्याद थप याःगु विरोधय् बम मुइकूगु !
येँ (सन्ध्या टाइम्स)/थौं सुथय् महाराजगंजया बसुन्धरा लागाया इशान नरसिंह होमया न्ह्यःने बम विष्फोट जुयाः प्यम्ह मनू घाःपाः जूगु दु ।
थौं सुथय् ७:१५ ताः इलय् बा. ७ च ५५३९ नम्बरया मारुती कारय् बम विष्फोट जूगु खः। बम विष्फोट जुयाः कार पूर्ण रुपं च्याःगु दुसा च्याःगु मि सशस्त्र प्रहरीया वारुणयन्त्रं स्याःगु खः। घटना विवरण कथं उगु कारय् च्वनावःपिं निम्ह मनूत नापं चालक कारं पिहांवःगु ५ मिनेट लिपा हे बम विष्फोट जूगु खः ।
कारय् २०-२० लिटरया पेट्रोलियम पदार्थ तयातःगु निगः जर्किन नं दुगुलिं कार बांमलाक च्याःगु खँ प्रहरीं धाःगु दु।
घटना जुइधुंकाः वंगु सुरक्षाकर्मीया बम डिस्पोजल पुचलं अन सकेट बम छगः नं निस्क्रिय याःगु खः ।
बम विष्फोट जुयाः अर्जुन पहाडी नापं प्यम्ह मनू घाःपाः जूगु दु। घाःपाः जूपिंत शिक्षण अस्पतालय् वासः याकाच्वंगु दु।
उगु बम विष्फोटया घटनायात कयाः अनुसन्धानया नितिं प्रहरीं कारया चालक दिपक विश्वकर्मा नापं प्यम्हेसित नियन्त्रणय् काःगु दु ।
थ्वहे दथुइ स्वतन्त्र नेपाल पार्टी छगू प्रेस विज्ञप्ति पिथना उगु विष्फोटन घटनाया जिम्मेवारी काःगु दु। पार्टीया केन्द्रीय ज्याकु सिन्धुलीगढी धकाः च्वयातःगु उगु पार्टीया प्यम्ह महासचिवं मंकाः कथं विज्ञप्ति पिथना उगु घटनाया जिम्मेवरी काःगु खः ।
महासचिवपिं विजय वाइवा, कृष्णचन्द्र फुँयाल, कर्म नेपाली व सुकु माझीं मंकाः कथं पिथनादीगु विज्ञप्तिइ संविधानसभाया म्याद थप याःगु विरोधय् बम विष्फोट यानागु सफलतापूर्वक क्वचाल धकाः न्ह्यथनातःगु दु
।
विज्ञप्तिइ सकेट बम प्लान्टेशन परीक्षण सफल जूगु दावी यानातःगु दुसा नेपाली जनताया भावनायात वेवास्ता यानाः इलय् हे संविधान दयेकेगु ज्या मयासे म्याद थप याःगुलिं उज्वःपिं सभासदतय्त ताके यानाः कारवाही कथं भ्याली कमाण्ड प्रमुख प्रहारया नेतृत्वय् स्पेशल टिमं उगु कथं बम विष्फोट याःगु खः धकाः तकं न्ह्यथना तःगु दु ।
