हानं चुनावय् बूम्ह हे न्हूम्ह प्रधानमन्त्री?

प्रधानमन्त्री माधव नेपालं राजीनामा बिल धाःसा वयां लिपा एमालेया हे खड्ग ओलीयात न्हूम्ह प्रधानमन्त्री दयेकेगु तयारी जुयाच्वंगु बारे चर्चा दु। ओलीयात प्रधानमन्त्री दयेकेगु लागिं एमालेपाखें मनोनित यानाः संविधानसभाय् छ्वया तःम्ह न्ह्याम्हसां छम्ह सभासद्यात राजीनामा याकाः ओलीयात नं संविधानसभाया दुजः दयेकेगु खेल शुरु जुयाच्वंगु बारे नं चर्चा जूगु दु ।

प्रधानमन्त्री माधव नेपालं राजीनामा बीगु चर्चा जुयाच्वंगु कारणं न्हूम्ह प्रधानमन्त्री मालीगु स्वाभाविक खः। तर न्हूम्ह प्रधानमन्त्रीया रुपय् खड्ग ओलीयात न्ह्यःने हल धाःसा व देशया लागिं हानं मेगु दुर्भाग्य जुइगु पक्का खः। संविधानसभाया चुनावय् जनतां बुकूम्ह मनूयात प्रधानमन्त्री दयेकल धकाः आलोचना जुयाच्वंगु इलय् वयागु विकल्पय् हानं मेम्ह चुनाव बूम्ह मनूयात न्ह्यःने तयेबलय् थ्व लोकतन्त्रयात बदनाम याःगु जक मखु, लोकतन्त्रयात बलात्कार हे याःगु सरह जुइ। चुनावय् जनतां तिरस्कार याःपिं मनूतय्त हे संसदीय बहुमतया नामय् जनताया उपर शासन याकेत छ्वया हयेगु ति अपमानपूर्ण ज्या मेगु छुं हे दइ मखु। लोकतन्त्रयात बजारय् तयाः खुलेआम बलात्कार याइपिं थज्याःपिं नेतातपाखें थ्व लोकतन्त्र सुरक्षित जुइ धकाः आशा यायेगु बेकार हे जुइ धाःसां जिउ। थुलि लज्या मचाःपिं नकचरातय्त जनतां थः नेता धकाः भाःपीमाःगु नं झीगु लागिं लज्याया विषय खः। उकिं चुनावय् बूपिं सुं नं मनूयात व्यवस्थाया नामय्, बहुमतया नामय् वा नियमया नामय् प्रधानमन्त्री थेंज्याःगु स्थानय् हानं थ्यंकेगु कुतःयात गुगुं हालतय् नं पनेमाःगु दु ।

More Stories Like this