विश्कपय् यौनकर्मीत खने मदइगु

विश्वकप फुटबलया दिं त्यया वःलिसे दक्षिण अफ्रिकाया मुख्य मुख्य शहरय् यौनकर्मी व फ्वगिंत चिइकेगु क्रम तिव्र याःगु दु । यौनकर्मीत फयाफक्वं खने मदयेकेगु धकाः अनया स्थानिय प्रहरी लगे जुयाच्वंगु दु ।

वंगु महिनांनिसें हे पुलिसं जोहानिसबर्गया फ्वगिं, अनाथ मस्त व यौनकर्मीत चिइकेगु क्रम शुरु याःगु खः । जोहानिसबर्ग मेट्रो पुलिसया प्रवक्ता एदना मेमोनिएनं धाःगु दु - "जिमिसं इमित सुरक्षित थासय् यंकेगु गाक्क कुतः यानागु दु । सेक्स वर्करतय्त नियंत्रित यायेत जिमित थाकुया च्वंगु दु । जिमिसं इमित न्हियान्हिथं चेतावनी बियाच्वनागु दु, माने जूसा ठिक हे जू मखुसा इमित गिरफ्तार यायेगु जुइ।"

मेखे मानवाधिकारीवादी संस्थातय्सं थुकिया विरोध यानाच्वंगु दु । ‘एडिक्शन एक्शन क्याम्पेन’या प्रमुख वारेन ह्विटफील्डं धाल, "गरीब-असहायपिन्त थनं चिइकाः छुं हे सुविधा मदुगु थासय् यंकाच्वंगु दु, थ्व मानवाधिकारया सरासर उल्लंघन खः ।"

लुमंके बहः जू दक्षिण अफ्रिकाय् ५७ लख स्वयां अप्वः एड्स पिडित मनूत दु ।

More Stories Like this